మురసు తుఫాను ప్రభావం.. విద్యుత్ సరఫరాకు ప్రత్యేక చర్యలు

అంతరాయం ఏర్పడితే తక్షణమే పునరుద్ధరణకు ఏర్పాట్లు విద్యుత్ శాఖ ఏడీఈ అనురాధ

మధిర, నవంబర్ 4: మురసు తుఫాను నేపథ్యంలో మధిర సబ్‌డివిజన్ పరిధిలో నిరంతర విద్యుత్ సరఫరా అందించేందుకు అన్ని ముందస్తు చర్యలు చేపట్టినట్లు విద్యుత్ శాఖ మధిర సబ్‌డివిజన్ ఏడీఈ అనురాధ తెలిపారు. మధిర, ఎర్రుపాలెం మండలాల్లో తుఫాను ప్రభావంతో విద్యుత్ సరఫరాకు అంతరాయం కలగకుండా అధికారులు, సిబ్బందిని అప్రమత్తం చేసినట్లు వెల్లడించారు. మంగళవారం సాయంత్రం 4 గంటల సమయంలో మాటూరు సబ్‌స్టేషన్ పరిధిలో విద్యుత్ స్తంభాలపై చెట్లు పడటంతో కొన్ని గంటలపాటు విద్యుత్ సరఫరా నిలిచిపోయిందని తెలిపారు. సమాచారం అందుకున్న విద్యుత్ శాఖ సిబ్బంది వెంటనే స్పందించి చెట్లను తొలగించి మరమ్మతులు చేపట్టడంతో రాత్రి 11 గంటలకు విద్యుత్ సరఫరాను పునరుద్ధరించినట్లు వివరించారు. తుఫాను ప్రభావంతో ఎక్కడైనా విద్యుత్ సరఫరాకు అంతరాయం ఏర్పడితే తక్షణమే స్పందించి సమస్యను పరిష్కరించేలా సిబ్బంది సిద్ధంగా ఉన్నారని పేర్కొన్నారు. మధిర, ఎర్రుపాలెం మండలాల పరిధిలో విద్యుత్ సరఫరా నిలిచిపోతే సంబంధిత సెక్షన్ ఏఈ లేదా విద్యుత్ శాఖ సిబ్బందికి సమాచారం అందించాలని ప్రజలకు సూచించారు. భారీ వర్షాలు, ఈదురుగాలుల సమయంలో విద్యుత్ స్తంభాలు, తెగిపడిన విద్యుత్ తీగలకు దూరంగా ఉండాలని, వాటిని తాకే ప్రయత్నం చేయవద్దని ఏడీఈ అనురాధ ప్రజలకు విజ్ఞప్తి చేశారు.