ఖమ్మంలో కత్తులు, గొడ్డళ్లతో యువకుల హల్‌చల్.. ఇద్దరిని అదుపులోకి తీసుకున్న టాస్క్‌ఫోర్స్ పోలీసులు

ఖమ్మం నగరంలో సామాజిక మాధ్యమాల్లో గుర్తింపు కోసం కొందరు యువకులు ప్రమాదకర చర్యలకు పాల్పడుతున్నారు. లైకులు, వీక్షణలు పెంచుకోవాలనే ఉద్దేశంతో కత్తులు, గొడ్డళ్లతో విన్యాసాలు చేస్తూ ప్రజల్లో భయాందోళనలు కలిగించేలా వీడియోలు రూపొందిస్తున్న ఇద్దరు యువకులను టాస్క్‌ఫోర్స్ పోలీసులు అదుపులోకి తీసుకున్నారు. నగరంలోని పంపింగ్ వెల్ రోడ్డు ప్రాంతానికి చెందిన దొడ్ల చరణ్, దమళ్ల సూర్యలను పోలీసులు పట్టుకుని తదుపరి చట్టపరమైన చర్యల నిమిత్తం ఖమ్మం త్రీ టౌన్ పోలీస్ స్టేషన్‌కు అప్పగించారు. ఈ సందర్భంగా టాస్క్‌ఫోర్స్ ఏసీపీ సత్యనారాయణ మాట్లాడుతూ, సామాజిక మాధ్యమాల్లో గుర్తింపు కోసం కత్తులు, గొడ్డళ్లు వంటి మారణాయుధాలతో వీడియోలు రూపొందించడం చట్టవిరుద్ధమని హెచ్చరించారు. ఇలాంటి చర్యలకు పాల్పడే వారిపై కఠిన చర్యలు తీసుకుంటామని స్పష్టం చేశారు. యువత సామాజిక మాధ్యమాల ప్రభావానికి లోనుకాకుండా, ప్రమాదకరమైన విన్యాసాలకు దూరంగా ఉండాలని సూచించారు.