మధిర క్రీడాకారిణికి ఘన సన్మానం జాతీయ క్రీడా దినోత్సవ వేడుకల్లో నేషనల్ కబడ్డీ ప్లేయర్ బి. హనీకి గౌరవం

మధిర, ఆగస్టు 29: జాతీయ క్రీడా దినోత్సవం సందర్భంగా ఖమ్మం జిల్లా సర్దార్ పటేల్ స్టేడియంలో నిర్వహించిన జిల్లా స్థాయి క్రీడాకారుల సన్మాన కార్యక్రమంలో మధిర మండలం మునగాల కృష్ణాపురం గ్రామానికి చెందిన నేషనల్ కబడ్డీ క్రీడాకారిణి బి. హనీ ఘన సత్కారం అందుకున్నారు.

ఖమ్మం జిల్లా కలెక్టర్ దివాకర్ టీఎస్, జిల్లా క్రీడా యువజన అధికారి సునీల్ రెడ్డి చేతుల మీదుగా హనీని ఘనంగా సన్మానించారు.

మునగాల కృష్ణాపురం గ్రామానికి చెందిన బి. హనీ, అరుణ కుమార్తె. ప్రస్తుతం మధిరలోని శ్రీనిధి జూనియర్ కళాశాలలో ఇంటర్ ద్వితీయ సంవత్సరం చదువుతున్నారు. కబడ్డీ క్రీడలో ప్రతిభ కనబరుస్తూ స్పోర్ట్స్ అథారిటీ ఆఫ్ ఇండియా (సాయ్) కేరళ రాష్ట్రం కొల్లంలో ప్రత్యేక శిక్షణ పొందుతున్నారు.

జాతీయ స్థాయిలో కబడ్డీ క్రీడలో రాణిస్తున్న హనీకి లభించిన ఈ గౌరవంపై కుటుంబ సభ్యులు, శ్రీనిధి కళాశాల యాజమాన్యం, అధ్యాపకులు అభినందనలు తెలిపారు. భవిష్యత్తులో మరిన్ని విజయాలు సాధించాలని ఆకాంక్షించారు.