పేదల ఆక్రమణల క్రమబద్ధీకరణకు చర్యలు

పేదల ఆక్రమణల క్రమబద్ధీకరణకు చర్యలు అర్హులైన లబ్ధిదారులకు పట్టాల పంపిణీకి ఆహ్వానం

ఎన్టీఆర్ జిల్లా తిరువూరు పట్టణంలోని పాత తిరువూరు రెవెన్యూ గ్రామ పరిధిలో ప్రభుత్వ భూముల్లో నివాసాలు ఏర్పరచుకొని జీవిస్తున్న అర్హులైన పేదల ఆక్రమణలను క్రమబద్ధీకరించి పట్టాలు మంజూరు చేసేందుకు ప్రభుత్వం చర్యలు చేపట్టింది.

జీఓ ఎంఎస్ నంబర్ 30 ప్రకారం చేపట్టిన ఈ కార్యక్రమంలో భాగంగా ఈ నెల 30వ తేదీన ముఖ్యమంత్రి నారా చంద్రబాబు నాయుడు చేతుల మీదుగా అర్హులైన పేదలకు పట్టాల పంపిణీ కార్యక్రమం నిర్వహించనున్నారు.

ఈ నేపథ్యంలో తిరువూరు పట్టణంలోని పాత తిరువూరు రెవెన్యూ గ్రామ పరిధిలో పట్టాల పంపిణీకి అర్హత సాధించిన సుమారు 15 మంది లబ్ధిదారులను కార్యక్రమానికి ఆహ్వానించేందుకు తిరువూరు రెవెన్యూ డివిజన్ అధికారి ఏ. కుమార్ స్వయంగా వారి నివాసాలకు వెళ్లారు. లబ్ధిదారులను పట్టాల పంపిణీ కార్యక్రమానికి హాజరు కావాలని ఆహ్వానించారు. ఈ కార్యక్రమంలో తిరువూరు తహసీల్దార్‌తో పాటు రెవెన్యూ సిబ్బంది పాల్గొన్నారు.

ప్రభుత్వం ప్రతిష్ఠాత్మకంగా చేపట్టిన ఈ కార్యక్రమం ద్వారా అర్హులైన పేదల ఆక్రమణలను క్రమబద్ధీకరించి వారికి పట్టాలు మంజూరు చేయడం జరుగుతుందని ఆర్డీఓ ఏ. కుమార్ తెలిపారు. ఈ చర్యల ద్వారా రాష్ట్రవ్యాప్తంగా అర్హులైన పేదలకు ప్రయోజనం కలుగుతుందని పేర్కొన్నారు.