బంగారం రికవరీ వ్యవహారంలో నార్కట్ పల్లి ఎస్‌ఐపై వేటు

NTODAY NEWS: నార్కట్‌పల్లి

నల్లగొండ జిల్లా  నార్కట్‌పల్లి పోలీస్‌స్టేషన్‌ పరిధిలో దొంగతనం కేసులో బంగారం రికవరీ వ్యవహారం పోలీసు వర్గాల్లో చర్చనీయాంశంగా మారింది. దొంగతనం కేసులో నిందితుడి నుంచి పోలీసులు స్వాధీనం చేసుకున్న బంగారంలో కొంత పక్కదారి పట్టించారనే ఆరోపణలు తెరపైకి వచ్చినట్లు సమాచారం. ఈ ఆరోపణల నేపథ్యంలో నార్కట్‌పల్లి పోలీస్‌స్టేషన్‌లో పనిచేస్తున్న ఎస్‌ఐపై ఉన్నతాధికారులు చర్యలు తీసుకున్నట్లు తెలుస్తోంది. ఎస్‌ఐని జిల్లా ఎస్పీ కార్యాలయానికి అటాచ్‌ చేస్తూ ఉత్తర్వులు జారీ చేసినట్లు సమాచారం. ఇదిలా ఉండగా, బంగారం రికవరీ వ్యవహారంలో మరో పోలీసు అధికారిపై కూడా ఆరోపణలు ఉన్నట్లు ప్రచారం జరుగుతోంది. అయితే సదరు అధికారిపై ఇప్పటివరకు ఎలాంటి చర్యలు తీసుకోకపోవడంపై పోలీసు శాఖలో చర్చ జరుగుతున్నట్లు సమాచారం. కీలక పోలీసు అధికారితో ఉన్న సాన్నిహిత్యం కారణంగానే ఆయనకు రక్షణ లభిస్తోందనే ప్రచారం కూడా సాగుతోంది. అయితే ఈ ఆరోపణల్లో వాస్తవమెంతన్నది అధికారికంగా తేలాల్సి ఉంది. బంగారం రికవరీ వ్యవహారంపై నిష్పక్షపాతంగా విచారణ జరిపి, ఆరోపణలు నిజమని తేలితే బాధ్యులపై చర్యలు తీసుకోవాలని పలువురు కోరుతున్నారు. ఈ వ్యవహారంపై పోలీసు ఉన్నతాధికారుల తదుపరి చర్యలపై ఉత్కంఠ నెలకొంది. ప్రస్తుతం బంగారం రికవరీ అంశం ఉమ్మడి నల్లగొండ జిల్లా పోలీసు వర్గాల్లో చర్చనీయాంశంగా మారింది.