చింతలపూడి ప్రభుత్వ డిగ్రీ కళాశాలలో ఎన్సీసీ ఎంపిక..
చింతలపూడి ప్రభుత్వ డిగ్రీ కళాశాలలో ఎన్సీసీ ఎంపిక.. 28 మంది విద్యార్థులు ఎంపిక
చింతలపూడి నియోజకవర్గ రిపోర్టర్ కుడిపుడి సత్తి బాబు
ఏలూరు జిల్లా: చింతలపూడి ప్రభుత్వ డిగ్రీ కళాశాలలో సోమవారం జాతీయ క్యాడెట్ కార్ప్స్ (ఎన్సీసీ) ఎన్రోల్మెంట్ కార్యక్రమాన్ని నిర్వహించారు. 19(ఏ) బెటాలియన్ ఎన్సీసీ ఏలూరు కమాండింగ్ ఆఫీసర్ లెఫ్టినెంట్ కల్నల్ అమిత్ పాండే ఆదేశాల మేరకు, కళాశాల ఎన్సీసీ అధికారిణి లెఫ్టినెంట్ జి. జీవన మౌనిక ఆధ్వర్యంలో 19(ఏ) బెటాలియన్ పీఐ సిబ్బంది విద్యార్థుల ఎంపిక ప్రక్రియను చేపట్టారు.
ఎన్రోల్మెంట్లో విద్యార్థులు ఉత్సాహంగా పాల్గొన్నారు. వివిధ దశల్లో నిర్వహించిన ఎంపిక ప్రక్రియ అనంతరం 17 మంది ఎస్డీ (సీనియర్ డివిజన్), 11 మంది ఎస్డబ్ల్యూ (సీనియర్ వింగ్) విభాగాల్లో కలిపి మొత్తం 28 మంది విద్యార్థులు ఎన్సీసీ క్యాడెట్లుగా ఎంపికయ్యారు.
ఈ సందర్భంగా కళాశాల ప్రిన్సిపాల్ డా. పి. శ్రీనివాసరావు మాట్లాడుతూ ఎన్సీసీ శిక్షణ ద్వారా విద్యార్థుల్లో క్రమశిక్షణ, నాయకత్వ లక్షణాలు, దేశభక్తి, సేవాభావంతో పాటు వ్యక్తిత్వ వికాసం పెంపొందుతాయని అన్నారు. ఎన్సీసీ శిక్షణలో భాగంగా బి, సి సర్టిఫికెట్లు సాధించే అవకాశం కూడా ఉంటుందని తెలిపారు.
ఎన్సీసీ క్యాడెట్లుగా ఎంపికైన విద్యార్థులను కళాశాల అధ్యాపకులు అభినందించారు.
