చాట్రాయి శివారులో పేకాట శిబిరంపై పోలీసుల దాడి

నలుగురు అదుపులో.. రూ.16,820 నగదు, 4 సెల్‌ఫోన్లు, 9 ద్విచక్ర వాహనాలు స్వాధీనం

ఏలూరు జిల్లా నూజివీడు నియోజకవర్గం చాట్రాయి మండలంలో పేకాట శిబిరంపై పోలీసులు దాడి నిర్వహించారు. నూజివీడు డీఎస్పీ కె.వి.వి.ఎన్.వి. ప్రసాద్, నూజివీడు రూరల్ సీఐ ఐ.వి. నాగేంద్రకుమార్ ఆదేశాల మేరకు చాట్రాయి ఎస్సై డి. రామకృష్ణకు అందిన సమాచారం ఆధారంగా 27/28 సెప్టెంబర్ 2026 రాత్రి చాట్రాయి గ్రామ శివారులో పేకాట శిబిరంపై పోలీసులు దాడి చేశారు.

ఈ దాడిలో పేకాట ఆడుతున్న నలుగురు వ్యక్తులను పోలీసులు అదుపులోకి తీసుకున్నారు. వారి వద్ద నుంచి రూ.16,820 నగదు, నాలుగు సెల్‌ఫోన్లు, తొమ్మిది ద్విచక్ర వాహనాలను స్వాధీనం చేసుకున్నారు. నలుగురు వ్యక్తులపై చాట్రాయి పోలీస్‌స్టేషన్‌లో కేసు నమోదు చేసినట్లు ఎస్సై డి. రామకృష్ణ తెలిపారు.

ఈ సందర్భంగా ఎస్సై రామకృష్ణ మాట్లాడుతూ జూదం వల్ల ప్రజలు ఆర్థికంగా నష్టపోయే అవకాశం ఉన్నందున ఎవరైనా జూదాన్ని ప్రోత్సహించినా, జూదంలో పాల్గొన్నా చట్టప్రకారం చర్యలు తీసుకుంటామని తెలిపారు. జూదం ఏ రూపంలో ఉన్నా ఉపేక్షించేది లేదని స్పష్టం చేశారు. గ్రామాలు, పరిసర ప్రాంతాల్లో జూదం నిర్వహిస్తున్నట్లు సమాచారం ఉంటే డయల్‌ 112కు లేదా చాట్రాయి ఎస్సై ఫోన్ నంబర్ 9440796455కు సమాచారం అందించాలని సూచించారు. సమాచారం అందించే వారి వివరాలను గోప్యంగా ఉంచుతామని తెలిపారు.