రైతులకు ప్రాణసంకటంగా విద్యుత్ తీగలు

 నల్గొండ జిల్లా చిట్యాల మున్సిపాలిటీ పరిధిలోని ఉరుమడ్ల రోడ్డులో బావుల వద్ద వేలాడుతున్న విద్యుత్ తీగలు రైతులకు, వ్యవసాయ కూలీలకు ప్రాణసంకటంగా మారాయి. పత్తి చేను కాతకు రావడంతో రోజూ పొలాల బాట పడుతున్న రైతులు, కూలీలు ఆ తీగల కింద నుంచే పంట తీయాల్సి వస్తోంది. తీగలు నేలకు అతి సమీపంలో వేలాడుతుండడంతో ఎప్పుడు ప్రమాదం జరుగుతుందోనని రైతులు ఆందోళన చెందుతున్నారు. పంట కోత సమయంలో  ఈ తీగలు తీవ్ర ఇబ్బందిగా మారుతున్నాయని రైతులు ఆవేదన వ్యక్తం చేస్తున్నారు. కావున విద్యుత్ శాఖ అధికారులు స్పందించి తక్షణమే ఆ ప్రాంతంలో అదనపు విద్యుత్ స్తంభం ఏర్పాటు చేసి వేలాడుతున్న తీగలను బిగించి రైతుల ప్రాణాలను కాపాడాలని రైతులు వేడుకుంటున్నారు.