రాష్ట్రస్థాయి సాఫ్ట్‌బాల్ పోటీలకు తిరువూరు విద్యార్థినులు ఎంపిక

ఎన్టీఆర్ జిల్లా తిరువూరు నియోజకవర్గం విస్సన్నపేట మండలం నరసాపురం జిల్లా పరిషత్ పాఠశాలలో సోమవారం ఉమ్మడి కృష్ణాజిల్లా స్థాయి సాఫ్ట్‌బాల్ జూనియర్స్ బాలబాలికల పోటీలు నిర్వహించారు. ఈ పోటీల్లో తిరువూరు పీఎం శ్రీ జిల్లా పరిషత్ హైస్కూల్ ప్లస్ విద్యార్థినులు ప్రతిభ కనబరిచి రాష్ట్రస్థాయి పోటీలకు ఎంపికయ్యారు.

పాఠశాలకు చెందిన జి. గీతా భవిష్య, ఎం. మయూరి, కె. నాగలక్ష్మి రాష్ట్రస్థాయి పోటీలకు ఎంపికైనట్లు పాఠశాల ప్రధానోపాధ్యాయురాలు బి. మృదుల తెలిపారు. విద్యార్థినులకు శిక్షణ అందించిన పీడీలు జి. సుకన్య, బి. జయలక్ష్మిని, రాష్ట్రస్థాయి పోటీలకు ఎంపికైన విద్యార్థినులను పాఠశాల సిబ్బంది అభినందించారు.

రాష్ట్రస్థాయి సాఫ్ట్‌బాల్ పోటీలు అక్టోబర్ 13, 14, 15 తేదీల్లో కడప జిల్లా పుల్లంపేటలో నిర్వహించనున్నట్లు ప్రధానోపాధ్యాయురాలు బి. మృదుల తెలిపారు. ఈ పోటీల్లో విద్యార్థినులు పాల్గొని ప్రతిభ కనబరచాలని పాఠశాల సిబ్బంది ఆకాంక్షించారు.