కండక్టర్ ప్రవళిక మృతికి నిరసనగా మధిర డిపోలో ఆర్టీసీ కార్మికుల విధుల బహిష్కరణ
మధిర, నవంబర్ 4: మణుగూరు ఆర్టీసీ డిపోకు చెందిన కండక్టర్ ప్రవళిక మృతి పట్ల ఆర్టీసీ కార్మికులు తీవ్ర దిగ్భ్రాంతి వ్యక్తం చేశారు. ప్రయాణికురాలు జరిపిన దాడిలో తీవ్రంగా గాయపడిన ప్రవళిక, గత పది రోజులుగా హైదరాబాద్‌లోని ఆసుపత్రిలో చికిత్స పొందుతూ మంగళవారం రాత్రి 10.30 గంటలకు తుదిశ్వాస విడిచారు.
ఈ విషాద ఘటనను నిరసిస్తూ, బాధిత కుటుంబానికి న్యాయం చేయాలని, విధి నిర్వహణలో ఉన్న ఆర్టీసీ ఉద్యోగులకు రక్షణ కల్పించాలని డిమాండ్ చేస్తూ బుధవారం మధిర డిపో కార్మికులు మొదటి బస్సు నుంచే విధులను బహిష్కరించి నిరసన చేపట్టారు.
ఈ సందర్భంగా జేఏసీ నాయకులు మాట్లాడుతూ, నిత్యం వేలాది మంది ప్రయాణికులను సురక్షితంగా గమ్యస్థానాలకు చేరుస్తూ ఎండనకా, వాననకా ప్రజలకు సేవలందిస్తున్న ఆర్టీసీ ఉద్యోగులపై దాడులు జరగడం అత్యంత దురదృష్టకరమని ఆవేదన వ్యక్తం చేశారు. ప్రజా రవాణా వ్యవస్థలో కీలక పాత్ర పోషిస్తున్న ఉద్యోగుల ప్రాణాలకే రక్షణ లేకపోవడం ఆందోళనకరమని పేర్కొన్నారు.
విధి నిర్వహణలో ఉన్న ఉద్యోగులపై దాడులకు పాల్పడే వారిపై కఠినమైన చట్టపరమైన చర్యలు తీసుకోవాలని, ఇలాంటి ఘటనలు పునరావృతం కాకుండా ప్రభుత్వం, ఆర్టీసీ యాజమాన్యం ప్రత్యేక భద్రతా చర్యలు చేపట్టాలని డిమాండ్ చేశారు. కండక్టర్ ప్రవళిక మృతికి బాధ్యులైన వారిపై కఠిన చర్యలు తీసుకోవడంతో పాటు ఆమె కుటుంబానికి తగిన న్యాయం చేయాలని, ఆర్టీసీ ఉద్యోగులందరికీ విధి నిర్వహణలో పూర్తి భద్రత కల్పించాలని కోరారు.
ఈ నిరసన కార్యక్రమంలో మధిర డిపో జేఏసీ నాయకులు, వివిధ కార్మిక సంఘాల ప్రతినిధులు, ఉద్యోగులు పెద్ద సంఖ్యలో పాల్గొని ప్రవళిక మృతికి సంతాపం తెలియజేశారు. ఆమె కుటుంబానికి ప్రగాఢ సానుభూతి ప్రకటించారు.
