అంగన్వాడీ కేంద్రంలో సేవా సంకల్ప్ అభియాన్

తిరువూరు, అక్టోబర్ 7: ఎన్టీఆర్ జిల్లా తిరువూరు నియోజకవర్గం గంపలగూడెం మండలం తునికిపాడు పంచాయతీ శివారు భగవాన్‌పురం గ్రామంలోని అంగన్వాడీ కేంద్రంలో బుధవారం సేవా సంకల్ప్ అభియాన్ కార్యక్రమాన్ని రెండో రోజు నిర్వహించారు.

కార్యక్రమంలో భాగంగా జోనెపోయిన భానుతేజ్, చిర్రా ఉమేష్ చిన్నారులకు వారి తల్లిదండ్రులు, బంధువుల సమక్షంలో అన్నప్రాసన కార్యక్రమాన్ని నిర్వహించారు. చిన్నారులకు తొలిసారిగా అన్నం తినిపించే కార్యక్రమం వైభవంగా జరిగింది.

అనంతరం నిర్వహించిన సభలో అంగన్వాడీ టీచర్ పదిలం వెంకాయమ్మ మాట్లాడుతూ ఆరోగ్యవంతమైన పిల్లల ఎదుగుదలకు తల్లిపాలు ఎంతో ముఖ్యమని తెలిపారు. ఆరు నెలల వయస్సు పూర్తైన తర్వాత తల్లిపాలతో పాటు తప్పనిసరిగా అనుబంధ ఆహారాన్ని ప్రారంభించాలని సూచించారు. చిన్నారుల ఆరోగ్యం, పోషణ కోసం ప్రభుత్వం అంగన్వాడీ కేంద్రాల ద్వారా అందిస్తున్న సేవలను తల్లిదండ్రులు, అర్హులైన మహిళలు సద్వినియోగం చేసుకోవాలని కోరారు.

గర్భిణీలు, బాలింతలు, చిన్నారులకు అంగన్వాడీ కేంద్రాల ద్వారా అందుతున్న పోషకాహారం, ఆరోగ్య సంబంధిత సేవలను సద్వినియోగం చేసుకోవాలని సూచించారు. కార్యక్రమంలో అంగన్వాడీ సిబ్బంది, చిన్నారులు, మహిళలు, తల్లిదండ్రులు, గ్రామస్తులు పాల్గొన్నారు.