శ్రీ కనకదుర్గ దేవి ఆలయంలో శరన్నవరాత్రి ఉత్సవాలు ప్రారంభం
అమ్మవారిని దర్శించుకున్న ప్రభుత్వ విప్, ఎమ్మెల్యే వేముల వీరేశం దంపతులు
చిట్యాల: చిట్యాల పట్టణంలోని ప్రసిద్ధ శ్రీ కనకదుర్గ దేవి ఆలయంలో దేవీ శరన్నవరాత్రి ఉత్సవాలు ఆదివారం ఘనంగా ప్రారంభమయ్యాయి. ఉత్సవాల ప్రారంభం సందర్భంగా నకిరేకల్ ఎమ్మెల్యే, ప్రభుత్వ విప్ వేముల వీరేశం తన సతీమణితో కలిసి ఆలయానికి చేరుకుని అమ్మవారిని దర్శించుకున్నారు.
ఈ సందర్భంగా నియోజకవర్గ ప్రజలందరూ సుఖసంతోషాలతో, ఆయురారోగ్యాలతో ఉండాలని అమ్మవారిని ప్రార్థించినట్లు తెలిపారు. అనంతరం ఆలయ అర్చకులు ఎమ్మెల్యే దంపతులకు వేద ఆశీర్వచనం అందించి, తీర్థప్రసాదాలను సమర్పించారు.
శరన్నవరాత్రి ఉత్సవాల ప్రారంభంతో ఆలయంలో భక్తిశ్రద్ధలు వెల్లివిరిశాయి. అమ్మవారి దర్శనం కోసం భక్తులు ఆలయానికి తరలివచ్చారు.
ఈ కార్యక్రమంలో ఆలయ కమిటీ చైర్మన్ మారగోని ఆంజనేయులు, ఆలయ డైరెక్టర్లు, చిట్యాల మున్సిపల్ చైర్మన్, కౌన్సిలర్లు, కాంగ్రెస్ పట్టణ అధ్యక్షుడు, ఆలయ కమిటీ సభ్యులు, కాంగ్రెస్ నాయకులు తదితరులు పాల్గొన్నారు.
