మధురపురి కాలనీ వాసుల చిరకాల సమస్యకు పరిష్కారం..

రూ.50 లక్షలతో నాలా కనెక్టివిటీ పనులు!

600 ఎంఎం పైప్‌లైన్ ద్వారా స్ట్రామ్ వాటర్ నాలాకు అనుసంధానం.. దీపావళి తర్వాత పనులు ప్రారంభించాలని అధికారులకు సూచించిన మాజీ కార్పొరేటర్ బద్దం ప్రేమ్ మహేశ్వర్ రెడ్డి

ఎల్బీనగర్, నవంబర్ 4 (ఎన్ టుడే న్యూస్): గడ్డిఅన్నారం డివిజన్ పరిధిలోని మధురపురి కాలనీ రోడ్ నంబర్–2 వద్ద వర్షాకాలంలో వర్షపు నీరు నిలిచిపోయి స్థానికులు ఎదుర్కొంటున్న సమస్యకు పరిష్కారం లభించనుంది. స్ట్రామ్ వాటర్ నాలాకు 600 ఎంఎం పైప్‌లైన్ ద్వారా కనెక్టివిటీ కల్పించేందుకు రూ.50 లక్షల జీహెచ్‌ఎంసీ నిధులతో పనులు చేపట్టనున్నారు.

వర్షపు నీటి నిల్వతో ప్రజలకు ఇబ్బందులు

మధురపురి కాలనీలోని ఈ ప్రాంతంలో స్ట్రామ్ వాటర్ నాలాకు సరైన కనెక్టివిటీ లేకపోవడంతో ప్రతి వర్షాకాలంలో నీరు నిలిచిపోయి కాలనీవాసులు, వీధి వ్యాపారులు, వాహనదారులు తీవ్ర ఇబ్బందులు ఎదుర్కొంటున్నారు. ఈ సమస్యను పరిష్కరించాలని స్థానికులు చాలాకాలంగా కోరుతున్నారు.

నిధుల మంజూరుకు మాజీ కార్పొరేటర్ కృషి

ఈ సమస్య పరిష్కారం కోసం తాజా మాజీ కార్పొరేటర్ బద్దం ప్రేమ్ మహేశ్వర్ రెడ్డి పలుమార్లు సంబంధిత అధికారులకు ఫిర్యాదులు చేయడంతో పాటు నిరంతరం వారి దృష్టికి తీసుకెళ్లారు. నాలా కనెక్టివిటీ పనులకు నిధులు మంజూరు చేయించాలని కృషి చేశారు. ఆయన ప్రయత్నాల ఫలితంగా రూ.50 లక్షల నిధులతో పనులు చేపట్టేందుకు చర్యలు తీసుకున్నారు.

దీపావళి అనంతరం పనులు ప్రారంభం

ఈ సందర్భంగా బద్దం ప్రేమ్ మహేశ్వర్ రెడ్డి మాట్లాడుతూ.. దీపావళి పండుగ సందర్భంగా మధురపురి కాలనీలోని వీధి వ్యాపారులు, స్థానిక ప్రజలు, వాహనదారులకు ఇబ్బందులు కలగకుండా పనులను పండుగ అనంతరం ప్రారంభించాలని అధికారులకు సూచించినట్లు తెలిపారు.

600 ఎంఎం పైప్‌లైన్ ద్వారా నాలాకు కనెక్టివిటీ కల్పించడం వల్ల వర్షాకాలంలో నీరు నిలిచిపోయే సమస్యకు శాశ్వత పరిష్కారం లభిస్తుందని ఆశాభావం వ్యక్తం చేశారు.

నాణ్యతతో నిర్ణీత గడువులో పనులు పూర్తి చేయాలి

పనులు ప్రారంభమైన తర్వాత ఎలాంటి జాప్యం లేకుండా నిర్ణీత సమయంలో పూర్తి చేయాలని కోరారు. జలమండలి, మల్కాజ్‌గిరి మున్సిపల్ కార్పొరేషన్ ఇంజనీరింగ్ విభాగం అధికారులు సమన్వయంతో పనిచేయాలని సూచించారు. నిర్మాణ పనుల్లో నాణ్యతా ప్రమాణాలు పాటించాలని, పనులు జరుగుతున్న సమయంలో ప్రజల రాకపోకలకు ఇబ్బందులు కలగకుండా తగిన ఏర్పాట్లు చేయాలని పేర్కొన్నారు. పనులు పూర్తయ్యే వరకు అధికారులు నిరంతరం పర్యవేక్షించాలని కోరారు.

పాల్గొన్న అధికారులు, స్థానికులు

ఈ కార్యక్రమంలో జలమండలి డివిజన్ మేనేజర్ మమత, డివిజన్ ఏఈ, ఇంజనీరింగ్ విభాగం వర్క్ ఇన్‌స్పెక్టర్ వెంకటేశ్వరరావు, జలమండలి వర్క్ ఇన్‌స్పెక్టర్ శ్రీనివాస్, సూపర్‌వైజర్ ప్రశాంత్, జీహెచ్‌ఎంసీ సిబ్బంది, స్థానిక వీధి వ్యాపారులు, కాలనీవాసులు తదితరులు పాల్గొన్నారు.