విద్యార్థుల సమస్యలు పరిష్కరించాలి

విద్యార్థుల సమస్యలు పరిష్కరించాలి: AISF విద్యార్థుల హక్కులను కాలరాస్తున్న కూటమి ప్రభుత్వం: AISF

GO 77 రద్దు చేయాలి.. BT కళాశాలకు యూనివర్సిటీ హోదా ఇవ్వాలి

మదనపల్లె: విద్యార్థుల సమస్యల పరిష్కారంలో ప్రభుత్వం నిర్లక్ష్యంగా వ్యవహరిస్తోందని AISF అన్నమయ్య జిల్లా సమితి ఆరోపించింది. విద్యార్థుల సమస్యలను పరిష్కరించాలని డిమాండ్ చేస్తూ AISF ఆధ్వర్యంలో మదనపల్లె ఎన్టీఆర్ సర్కిల్ వద్ద నిరసన కార్యక్రమం నిర్వహించారు.

ఈ సందర్భంగా AISF అన్నమయ్య జిల్లా కార్యదర్శి కె. మాధవ్ మాట్లాడుతూ ఉన్నత విద్యను పేద, మధ్యతరగతి విద్యార్థులకు దూరం చేసే విధంగా ఉన్న GO నెం.77ను వెంటనే రద్దు చేయాలని డిమాండ్ చేశారు. మదనపల్లె BT కళాశాలకు యూనివర్సిటీ స్థాయి హోదా కల్పించాలని కోరారు.

జిల్లాలోని ప్రభుత్వ వసతి గృహాల పరిస్థితులపై ప్రభుత్వం దృష్టి సారించాలని, అన్ని వసతి గృహాలకు పక్కా భవనాలు నిర్మించడంతో పాటు విద్యార్థులకు అవసరమైన మౌలిక వసతులు కల్పించాలని అన్నారు. నిత్యావసర వస్తువుల ధరలు పెరుగుతున్నప్పటికీ విద్యార్థుల మెస్ నిర్వహణకు సరిపడే విధంగా మెస్, కాస్మోటిక్ ఛార్జీలను పెంచకపోవడం వల్ల విద్యార్థులు ఇబ్బందులు ఎదుర్కొంటున్నారని తెలిపారు.

విద్యార్థులకు ఇచ్చిన హామీలను అమలు చేయడంలో ప్రభుత్వం జాప్యం చేస్తోందని విమర్శించిన ఆయన, హామీల అమలుపై విద్యాశాఖ మంత్రి నారా లోకేష్ బాధ్యత వహించాలని, పదవికి రాజీనామా చేయాలని డిమాండ్ చేశారు.

విద్యార్థుల సమస్యలపై ప్రభుత్వం తక్షణమే స్పందించి పరిష్కార చర్యలు చేపట్టాలని, లేకపోతే జిల్లావ్యాప్తంగా విద్యార్థులను సమీకరించి ఉద్యమాన్ని మరింత ఉధృతం చేస్తామని కె. మాధవ్ హెచ్చరించారు.