ఆపరేషన్ త్రిశూల్‌లో భాగంగా తిరువూరు పోలీసుల అవగాహన కార్యక్రమం

ఎన్టీఆర్ జిల్లా తిరువూరు పోలీస్ స్టేషన్ పరిధిలో డ్రగ్స్ నిర్మూలన, మహిళల భద్రత, రోడ్డు ప్రమాదాల నివారణ లక్ష్యంగా పోలీసులు ఆపరేషన్ త్రిశూల్ నిర్వహించారు. జిల్లా పోలీస్ కమిషనర్ ఎస్‌వీ రాజశేఖర బాబు ఆదేశాల మేరకు, రూరల్ డీసీపీ బి. లక్ష్మీనారాయణ ఐపీఎస్ దిశానిర్దేశంలో, మైలవరం ఏసీపీ రామచంద్రరావు నేతృత్వంలో, తిరువూరు సర్కిల్ ఇన్‌స్పెక్టర్ గురు ప్రకాష్ పర్యవేక్షణలో ఈ కార్యక్రమాన్ని చేపట్టారు.

అక్టోబర్ 2వ తేదీ శుక్రవారం సాయంత్రం లక్ష్మీపురం సర్కిల్ వద్ద వాహనదారులకు రహదారి భద్రతపై పోలీసులు అవగాహన కల్పించారు. రోడ్డు ప్రమాదాలను నివారించేందుకు వాహనదారులు ట్రాఫిక్ నిబంధనలను తప్పనిసరిగా పాటించాలని, ప్రయాణ సమయంలో అప్రమత్తంగా ఉండాలని సూచించారు. మాదకద్రవ్యాల వినియోగం వల్ల కలిగే అనర్థాలను వివరిస్తూ, డ్రగ్స్‌కు దూరంగా ఉండాలని ప్రజలకు పిలుపునిచ్చారు.

ఈ కార్యక్రమంలో తిరువూరు ఎస్‌ఐ వై.వి. శాతకర్ణి రహదారి భద్రత, డ్రగ్స్ నిర్మూలనపై అవగాహన కల్పించగా, మహిళా ఎస్‌ఐ గౌరీశ్వరి మహిళల భద్రత, మహిళలపై జరిగే అఘాయిత్యాల నివారణపై వివరించారు. మహిళల భద్రతకు ప్రాధాన్యమిస్తూ, వేధింపులకు పాల్పడేవారిపై కఠిన చర్యలు తీసుకునేలా పోలీసు శాఖ పనిచేస్తుందని అవగాహన కల్పించారు.

ప్రజల భద్రతే లక్ష్యంగా, ప్రతి ప్రాణాన్ని రక్షించడమే ధ్యేయంగా ఆపరేషన్ త్రిశూల్ కొనసాగుతుందని పోలీసులు తెలిపారు. డ్రగ్స్ రహిత సమాజం, మహిళలకు సురక్షిత వాతావరణం, ప్రమాదాలు లేని రహదారుల సాధనకు ప్రజలందరూ పోలీసులకు సహకరించాలని కోరారు.