తాళం వేసిన ఇంట్లో చోరీ.. బంగారం, వెండి, నగదు అపహరణ

కరీంనగర్: తాళం వేసి ఉన్న ఇంటిని లక్ష్యంగా చేసుకున్న దొంగలు బంగారం, వెండి ఆభరణాలతో పాటు నగదును అపహరించారు. ఈ ఘటన తిమ్మాపూర్ మండలం కొత్తపల్లి గ్రామంలో చోటుచేసుకుంది.

గ్రామానికి చెందిన ఇనుకొండ దామోదర్ రెడ్డి కుటుంబం మూడు రోజుల క్రితం ఊరికి వెళ్లింది. శుక్రవారం సాయంత్రం తిరిగి ఇంటికి చేరుకున్న కుటుంబ సభ్యులకు తలుపుల తాళాలు పగులగొట్టి ఉండటాన్ని గుర్తించారు. ఇంట్లోకి వెళ్లి చూడగా వస్తువులు చిందరవందరగా పడి ఉండటంతో చోరీ జరిగినట్లు నిర్ధారించుకున్నారు.

ఈ ఘటనలో అర తులం బంగారం, 12 తులాల వెండి పట్టీలు, రూ.10 వేల నగదు చోరీకి గురైనట్లు బాధితులు తెలిపారు. సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. క్లూస్ టీమ్‌ను రప్పించి వేలిముద్రలు సేకరించారు. ఘటనపై కేసు నమోదు చేసి దర్యాప్తు చేపట్టినట్లు సమాచారం.