వర్షాలు కురవాలని కప్ప కాముడు ఆటలు

వరుణ దేవుని అనుగ్రహం కోసం గ్రామంలో సంప్రదాయ కార్యక్రమం

నల్గొండ జిల్లా, చిట్యాల: మండలంలోని ఊరుమడ్ల గ్రామంలో వర్షాలు సకాలంలో కురవాలని ఆకాంక్షిస్తూ సంప్రదాయంగా నిర్వహించే కప్ప కాముడు ఆటలు కార్యక్రమాన్ని గ్రామ మహిళలు నిర్వహించారు.

వర్షాలు సకాలంలో కురవక రైతులు ఇబ్బందులు ఎదుర్కొంటున్న పరిస్థితిని గుర్తించిన గ్రామస్థులు.. వరుణ దేవుని అనుగ్రహం కోసం ఈ సంప్రదాయ ఆచారాన్ని నిర్వహించారు. ఇందులో భాగంగా కప్పను ఇంటింటికీ తీసుకెళ్లి, కప్పపై నీళ్లు పోస్తూ వర్షాలు కురవాలని ప్రార్థనలు చేశారు.

ఈ సందర్భంగా గ్రామ ప్రజలు సమృద్ధిగా వర్షాలు కురిసి పంటలు పండాలని, రైతులు సంతోషంగా ఉండాలని ఆకాంక్షించారు.

ఈ కార్యక్రమంలో గ్రామ సర్పంచ్ శ్రీమతి సాగర్ల భానుశ్రీ భిక్షంతో పాటు గ్రామ మహిళలు పాల్గొన్నారు.