ప్రతి ఇంటికి యోగా చేరాలి.. ప్రతి ఒక్కరూ యోగా చేయాలి
చిన్నకాపర్తి (ఎన్‌ టుడే న్యూస్‌): ప్రతి ఇంటికి యోగా చేరాలని, ప్రతి ఒక్కరూ యోగా, ధ్యానం అలవాటు చేసుకోవాలని ది ఆర్ట్‌ ఆఫ్‌ లివింగ్‌ టీచర్‌ పల్లపు బుద్ధుడు పిలుపునిచ్చారు. ‘హర్‌ ఘర్‌ ధ్యాన్‌.. జీవించడం ఒక కళ’ అనే నినాదంతో ఆదివారం నల్గొండ జిల్లా చిట్యాల మండలం చిన్నకాపర్తి గ్రామంలో యోగా, మెడిటేషన్‌ కార్యక్రమాలపై అవగాహన కల్పించారు.
గ్రామంలోని రైతు వేదిక వద్ద యోగా, ధ్యాన కార్యక్రమాలు నిర్వహించేందుకు రూపొందించిన కరపత్రాలను గ్రామ సర్పంచ్‌ ఆవుల సుందర్‌ యాదవ్‌, మండల అధ్యక్షుడు జడల చిన్న మల్లయ్య విడుదల చేశారు. గ్రామ ప్రజలు, యువకులు, విద్యార్థులకు యోగా ఆసనాలు నేర్పడంతో పాటు ధ్యాన కార్యక్రమాలు నిర్వహించనున్నట్లు నిర్వాహకులు తెలిపారు.
ఈ సందర్భంగా పల్లపు బుద్ధుడు మాట్లాడుతూ.. ది ఆర్ట్‌ ఆఫ్‌ లివింగ్‌ కోర్సు ఒత్తిడిని తగ్గించుకోవడానికి, మానసిక ప్రశాంతతను పెంపొందించుకోవడానికి, ఆరోగ్యం, జీవశక్తిని మెరుగుపరుచుకోవడానికి దోహదపడుతుందని వివరించారు. యోగా, ధ్యానం, శ్వాసకు సంబంధించిన అభ్యాసాలు జీవనశైలిలో భాగం చేసుకోవాలని సూచించారు.
సుదర్శన క్రియ ద్వారా ఒత్తిడిని ఎదుర్కోవడంలో, మానసిక ప్రశాంతతను పెంపొందించుకోవడంలో ప్రయోజనం ఉంటుందని పేర్కొన్నారు. ఒత్తిడిని తగ్గించుకోవడం, వ్యక్తిగత సంబంధాలను మెరుగుపరుచుకోవడం కోసం ఈ అభ్యాసాలు ఉపయోగపడతాయని తెలిపారు.
ఈ కార్యక్రమంలో చిట్యాల వ్యవసాయ మార్కెట్‌ కమిటీ డైరెక్టర్‌ కోనేటి యాదగిరి, పీఏసీఎస్‌ చైర్మన్‌ ఏనుగు రఘుమారెడ్డి, అద్దెల లింగారెడ్డి, బెల్లంకొండ రఘు, ఆవుల రమేష్, మెట్టు నాగశంకర్‌, వలిగొండ సత్యనారాయణ, నరసింహ, ప్రశాంత్‌, అశోక్‌, వెంకన్న, దివాకర్‌, లింగయ్య, శంకరయ్య, రమేష్, వెంకటేష్‌, పరమేష్‌ తదితరులు పాల్గొన్నారు.
