జాతీయ ఏకతా దివస్ వేడుకలకు జిల్లా నుంచి 30 మంది ప్రయాణం
గుజరాత్‌లోని స్టాచ్యూ ఆఫ్ యూనిటీ వద్ద సర్దార్ పటేల్ 151వ జయంతి వేడుకలు
బృందానికి ఇన్‌చార్జిగా ఏసీపీ కృష్ణ గౌడ్
హైదరాబాద్, అక్టోబర్ 30 (ఎన్ టుడే న్యూస్):
భారత తొలి ఉపప్రధాని, ఉక్కు మనిషి సర్దార్ వల్లభ్‌భాయ్ పటేల్ 151వ జయంతిని పురస్కరించుకుని ఈ నెల 31న గుజరాత్‌లోని నర్మదా జిల్లా కెవడియాలో జాతీయ ఏకతా దివస్ (రాష్ట్రీయ ఏక్తా దివస్) వేడుకలు నిర్వహించనున్నారు. ఈ సందర్భంగా స్టాచ్యూ ఆఫ్ యూనిటీ వద్ద కేంద్ర ప్రభుత్వం ఆధ్వర్యంలో భారత్ పర్వ్ కార్యక్రమాన్ని ఘనంగా నిర్వహించేందుకు ఏర్పాట్లు చేశారు.
ఈ వేడుకల్లో పాల్గొనేందుకు జిల్లా నుంచి 30 మంది సభ్యులతో కూడిన బృందం గురువారం గుజరాత్‌కు బయలుదేరింది. ఈ బృందానికి ఇన్‌చార్జిగా ఏసీపీ కృష్ణ గౌడ్ వ్యవహరిస్తున్నారు.
ఆకట్టుకోనున్న భద్రతా బలగాల ప్రదర్శనలు
ఈ వేడుకల్లో పోలీసు, పారామిలటరీ బలగాలతో పాటు భారత వైమానిక దళానికి చెందిన సిబ్బంది పాల్గొని ప్రత్యేక ప్రదర్శనలు ఇవ్వనున్నట్లు నిర్వాహకులు తెలిపారు. దేశ ఐక్యత, సమగ్రత, సార్వభౌమత్వాన్ని చాటిచెప్పేలా కార్యక్రమాలు నిర్వహించనున్నారు.
'ఏక్ భారత్ – శ్రేష్ఠ భారత్' స్ఫూర్తిని ప్రతిబింబించేలా ఈ వేడుకలు చరిత్రలో నిలిచిపోతాయని బృంద సభ్యులు పేర్కొన్నారు.
గుజరాత్‌కు బయలుదేరిన వారిలో జెస్సు, అనిల్ కుమార్, నరేష్ చారి, శ్రీకాంత్ తదితరులు ఉన్నారు.
