శతాబ్దం దాటిన దేవాలయం.. నిధులు లేవంటూ కాలయాపన

20 షాపుల అద్దెలు వస్తున్నా పునర్నిర్మాణం ఎందుకు చేపట్టడం లేదు?

వేలంపాట లేకుండా పాత వారికే షాపుల కేటాయింపుపై ప్రశ్నలు

తిరువూరు: ఎన్టీఆర్ జిల్లా తిరువూరు బస్టాండ్ ఎదురుగా ఉన్న శ్రీ రామలింగేశ్వర స్వామి దేవస్థానం శతాబ్దానికి పైగా చరిత్ర కలిగిన పురాతన ఆలయంగా ఉంది. ఆలయ భవనం శిథిలావస్థకు చేరుతున్న నేపథ్యంలో పునర్నిర్మాణం చేపట్టేందుకు గతంలో ప్రతిపాదనలు చేసినప్పటికీ, ఇప్పటివరకు పనులు ప్రారంభం కాకపోవడంపై భక్తులు, స్థానికులు అసంతృప్తి వ్యక్తం చేస్తున్నారు.

ఆలయ అభివృద్ధికి నిధులు లేవని అధికారులు చెబుతున్నప్పటికీ, దేవస్థానానికి చెందిన సుమారు 20 షాపుల నుంచి అద్దెల రూపంలో ఆదాయం వస్తున్నట్లు స్థానికులు చెబుతున్నారు. ఈ నేపథ్యంలో షాపుల ద్వారా వచ్చే ఆదాయాన్ని ఆలయ పునర్నిర్మాణం, అభివృద్ధికి ఎందుకు వినియోగించడం లేదని భక్తులు ప్రశ్నిస్తున్నారు.

షాపుల కేటాయింపుపై ప్రశ్నలు

దేవస్థానానికి చెందిన షాపులను నిబంధనల ప్రకారం బహిరంగ వేలంపాట ద్వారా కేటాయిస్తున్నారా లేదా అనే అంశంపై కూడా స్థానికుల్లో చర్చ జరుగుతోంది. వేలంపాట నిర్వహించకుండా పాత వారికే షాపులను కొనసాగిస్తున్నారనే ఆరోపణలు వినిపిస్తున్న నేపథ్యంలో అధికారులు స్పష్టత ఇవ్వాలని భక్తులు కోరుతున్నారు.

షాపుల అద్దెలను ఎంత మొత్తంలో వసూలు చేస్తున్నారు, ఏళ్ల తరబడి వచ్చిన మొత్తం ఆదాయం ఎంత, ఆ మొత్తాన్ని దేవస్థానం ఖాతాలో ఎంత మేరకు జమ చేశారు, ఆలయ అభివృద్ధికి ఎంత ఖర్చు చేశారు అనే వివరాలను బహిర్గతం చేయాలని వారు డిమాండ్ చేస్తున్నారు.

ఆదాయ, వ్యయ వివరాలు వెల్లడించాలని డిమాండ్

చారిత్రక ప్రాధాన్యత కలిగిన ఆలయం పునర్నిర్మాణానికి నిధుల కొరత ఉంటే, దేవస్థానానికి వచ్చే సొంత ఆదాయాన్ని వినియోగించే అవకాశాలను పరిశీలించాలని భక్తులు కోరుతున్నారు. ఆలయానికి సంబంధించిన ఆదాయ, వ్యయ వివరాలను పారదర్శకంగా వెల్లడించి, పునర్నిర్మాణ పనులను త్వరగా చేపట్టాలని డిమాండ్ చేస్తున్నారు.

అదేవిధంగా షాపుల కేటాయింపు, అద్దెల వసూలు, దేవస్థానం నిధుల వినియోగంపై సంబంధిత అధికారులు పూర్తి వివరాలను వెల్లడించి భక్తుల సందేహాలకు సమాధానం ఇవ్వాలని స్థానికులు కోరుతున్నారు.