ఐదేళ్లుగా కోర్టుకు హాజరుకాకుండా తప్పించుకున్న నిందితుడి అరెస్ట్

• పోక్సో కేసులో నాన్ బెయిలబుల్ వారెంట్.. బయ్యారం పోలీసుల ప్రత్యేక చర్యలు

మహబూబాబాద్, నవంబర్ 6 (ఎన్ టుడే న్యూస్): పోక్సో కేసులో న్యాయస్థానం విచారణకు వరుసగా హాజరుకాకుండా ఐదేళ్లుగా తప్పించుకుని తిరుగుతున్న నిందితుడిని బయ్యారం పోలీసులు అరెస్టు చేసి జైలుకు తరలించారు. న్యాయస్థానం జారీ చేసిన నాన్ బెయిలబుల్ వారెంట్ అమలు చేసే క్రమంలో పోలీసులు ప్రత్యేక చర్యలు చేపట్టి నిందితుడి ఆచూకీ గుర్తించినట్లు బయ్యారం సర్కిల్ ఇన్‌స్పెక్టర్ ఎల్. రవీందర్ వెల్లడించారు.

పోలీసులు తెలిపిన వివరాల ప్రకారం.. భద్రాద్రి కొత్తగూడెం జిల్లా టేకులపల్లి మండలం ఒజ్జోనిగూడెం గ్రామానికి చెందిన సూర్నపాక రాము (42)పై బయ్యారం పోలీస్‌స్టేషన్ పరిధిలో 2017లో పోక్సో చట్టం కింద కేసు నమోదైంది. అప్పట్లో పోలీసులు అతడిని అరెస్టు చేసి న్యాయస్థానంలో హాజరుపరచగా, కోర్టు రిమాండ్ విధించింది.

అనంతరం కేసు విచారణలో భాగంగా నిందితుడు న్యాయస్థానానికి హాజరుకావాల్సి ఉండగా, వరుసగా గైర్హాజరవుతూ విచారణకు దూరంగా ఉంటున్నాడు. దీంతో న్యాయస్థానం అతడిపై నాన్ బెయిలబుల్ వారెంట్ జారీ చేసింది.

ఈ నేపథ్యంలో వారెంట్ అమలుపై దృష్టి సారించిన బయ్యారం పోలీసులు నిందితుడి ఆచూకీ కోసం చర్యలు చేపట్టారు. చివరకు అతడిని గుర్తించి అరెస్టు చేశారు. అనంతరం న్యాయస్థానంలో హాజరుపరచగా, కోర్టు ఆదేశాల మేరకు జైలుకు తరలించారు.

ఈ సందర్భంగా సీఐ ఎల్. రవీందర్ మాట్లాడుతూ న్యాయస్థానాల ఆదేశాలను పాటించకుండా, విచారణకు హాజరుకాకుండా తప్పించుకుని తిరిగే వారిపై చట్టప్రకారం చర్యలు తీసుకుంటామని హెచ్చరించారు. కోర్టు జారీ చేసిన వారెంట్ల అమలులో పోలీసులు నిరంతరం చర్యలు చేపడతారని తెలిపారు.

ఈ అరెస్టు కార్యక్రమంలో ఎస్ఐ ప్రశాంత్ బాబు, పోలీసు సిబ్బంది మధుసూదన్ రెడ్డి తదితరులు పాల్గొన్నారు.