జనసేన ఎంపీటీసీ అభ్యర్థి గారపాటి దివ్య హఠాన్మరణం

ఓట్ల లెక్కింపునకు ఒక్కరోజు ముందు విషాదం.. కుటుంబాన్ని పరామర్శించి రూ.లక్ష ఆర్థిక సాయం అందించిన ఎమ్మెల్యే మద్దిపాటి వెంకటరాజు

దేవరపల్లి (ఎన్ టుడే న్యూస్):

తూర్పుగోదావరి జిల్లా దేవరపల్లి మండలం ధూమంతునిగూడెం గ్రామానికి చెందిన జనసేన పార్టీ ఎంపీటీసీ అభ్యర్థి గారపాటి దివ్య హఠాన్మరణం చెందడంతో గ్రామంలో విషాదం నెలకొంది. ఆమె మరణవార్తతో జనసేన పార్టీ శ్రేణులు దిగ్భ్రాంతికి గురయ్యాయి.

స్థానిక సంస్థల ఎన్నికల పోలింగ్ పూర్తయి, మరుసటి రోజు ఓట్ల లెక్కింపు జరగనున్న నేపథ్యంలో అభ్యర్థి దివ్య మరణించడం గ్రామస్థులు, పార్టీ కార్యకర్తలను తీవ్ర విషాదానికి గురిచేసింది. ఎన్నికల ప్రక్రియలో భాగంగా పోటీ చేసిన అభ్యర్థి ఆకస్మికంగా మృతి చెందడంతో గ్రామంలో విషాద వాతావరణం నెలకొంది.

ఈ విషయం తెలుసుకున్న గోపాలపురం నియోజకవర్గ ఎమ్మెల్యే మద్దిపాటి వెంకటరాజు దివ్య కుటుంబాన్ని పరామర్శించారు. కుటుంబ సభ్యులకు ప్రగాఢ సానుభూతి తెలియజేసి, వారికి ధైర్యం చెప్పారు. తక్షణ సహాయంగా రూ.లక్ష ఆర్థిక సాయాన్ని అందజేశారు.

కుటుంబానికి భవిష్యత్తులోనూ అండగా ఉంటానని ఎమ్మెల్యే మద్దిపాటి వెంకటరాజు భరోసా ఇచ్చారు. దివ్య మరణంతో ధూమంతునిగూడెం గ్రామంలో విషాదఛాయలు అలుముకున్నాయి.