మోతే పరిసరాల్లో పులి సంచారంపై ప్రచారం..

రైతులు అప్రమత్తంగా ఉండాలని సూచన

అడుగుజాడలను పరిశీలించిన అటవీశాఖ అధికారులు.. పులి ఉనికిపై ఇంకా స్పష్టత లేదు

నిజామాబాద్ జిల్లా (ఎన్ టుడే న్యూస్): వేల్పూర్ మండలం మోతే గ్రామ పరిసరాల్లో పులి సంచరిస్తోందనే ప్రచారం స్థానికంగా కలకలం రేపుతోంది. ఓ వ్యవసాయ క్షేత్రంలో పులి కనిపించిందంటూ కొన్ని ఫొటోలు ప్రచారంలోకి రావడంతో గ్రామస్తులు ఆందోళనకు గురయ్యారు.

సమాచారం అందుకున్న అటవీశాఖ అధికారులు సంబంధిత ప్రాంతానికి చేరుకుని అక్కడ కనిపించిన అడుగుజాడలను పరిశీలించారు. అయితే అవి పులి అడుగుజాడలేనని ఇంకా నిర్ధారణ కాలేదని సమాచారం. అధికారులు మరింత పరిశీలన చేసిన తర్వాతే పులి సంచారంపై స్పష్టత వచ్చే అవకాశం ఉంది.

ఈ నేపథ్యంలో రైతులు వ్యవసాయ పనుల కోసం పొలాలకు వెళ్లేటప్పుడు అప్రమత్తంగా ఉండాలని, ఒంటరిగా వెళ్లకుండా గుంపులుగా వెళ్లాలని సూచిస్తున్నారు. పులి కనిపించినా, అనుమానాస్పద అడుగుజాడలు గుర్తించినా దాని దగ్గరకు వెళ్లకుండా అటవీశాఖ లేదా పోలీసులకు సమాచారం అందించాలి.