ఎయిర్ ఇండియా విమానానికి భద్రతా హెచ్చరిక.. జైపూర్‌కు మళ్లింపు
జైపూర్: ఫ్రాంక్‌ఫర్ట్ నుంచి ఢిల్లీకి వస్తున్న ఎయిర్ ఇండియా విమానం AI2030ను జైపూర్‌కు మళ్లించారు. విమానం నుంచి పైలట్ కొద్దిసేపు స్క్వాక్ కోడ్ 7500 పంపిన నేపథ్యంలో భద్రతాపరమైన చర్యల్లో భాగంగా ఈ నిర్ణయం తీసుకున్నట్లు సమాచారం.
బోయింగ్ 787-9 రకానికి చెందిన ఈ విమానం ఉదయం 9:35 గంటలకు జైపూర్ విమానాశ్రయంలో సురక్షితంగా ల్యాండ్ అయింది. అనంతరం భద్రతా తనిఖీల కోసం విమానాన్ని ప్రత్యేక ఐసోలేషన్ బేలోకి తరలించారు.
విమాన సిబ్బందితో కలిపి సుమారు 306 మంది ప్రయాణికులు, సిబ్బంది క్షేమంగా దిగినట్లు సమాచారం. విమానం మళ్లింపునకు దారితీసిన పరిస్థితులపై పూర్తి వివరాలు వెల్లడికావాల్సి ఉంది.
గమనిక: స్క్వాక్ కోడ్ 7500 సాధారణంగా విమానంలో చట్టవిరుద్ధ జోక్యం లేదా హైజాక్ పరిస్థితిని సూచిస్తుంది. అయితే ఈ కోడ్ పంపిన కారణం అధికారికంగా నిర్ధారణ అయ్యే వరకు హైజాక్ జరిగిందని భావించరాదు.
