అల్లాపురం 552 మంది రిటైర్డ్ ఉద్యోగుల ఇళ్ల స్థలాల సమస్య పరిష్కరించాలి
గన్నవరం నియోజకవర్గం అల్లాపురం గ్రామానికి చెందిన 552 మంది రిటైర్డ్ ఉద్యోగుల ఇళ్ల స్థలాల సమస్యను ప్రభుత్వం తక్షణం పరిష్కరించాలని అఖిలభారత కిసాన్ మహాసభ రాష్ట్ర కార్యదర్శి డి. హరినాథ్ డిమాండ్ చేశారు.
11 సంవత్సరాల క్రితం తమ కష్టార్జిత సొమ్ముతో కొనుగోలు చేసుకున్న ఇళ్ల స్థలాలను గన్నవరం విమానాశ్రయ అభివృద్ధి పేరుతో ప్రభుత్వం సేకరించిందని ఆయన తెలిపారు. భూములు కోల్పోయిన వారికి ప్రత్యామ్నాయంగా ఇళ్ల స్థలాలు, నష్టపరిహారం అందించడంలో ప్రభుత్వం విఫలమైందని విమర్శించారు. ఈ సమస్య పరిష్కారానికి స్థానిక ఎమ్మెల్యే యార్లగడ్డ వెంకట్రావు బాధ్యత తీసుకోవాలని డిమాండ్ చేశారు.
బాధితులకు నాయకత్వం వహిస్తున్న వేదవతి 11 సంవత్సరాలుగా రెవెన్యూ అధికారులు, సంబంధిత మంత్రుల చుట్టూ తిరుగుతున్నప్పటికీ సమస్య పరిష్కారం కాకపోవడం బాధ్యతారాహిత్యమని హరినాథ్ అన్నారు. సమస్య పరిష్కారం కోసం బాధితులు న్యాయస్థానాన్ని ఆశ్రయించినప్పటికీ రెవెన్యూ అధికారులు సకాలంలో స్పందించకపోవడంతో కేసు వాయిదాల మీద వాయిదాలు పడుతోందని తెలిపారు.
లబ్ధిదారుల్లో కొందరు ఇప్పటికే ప్రాణాలు కోల్పోయినా సమస్య పరిష్కారం కాకపోవడం బాధాకరమన్నారు. బాధితులు తమ భూములకు ప్రత్యామ్నాయంగా భూములు, ఇళ్ల స్థలాలు మాత్రమే కోరుతున్నారని చెప్పారు. అజ్జంపూడిలో సుమారు 50 ఎకరాలను భూసమీకరణలో సేకరించిన నేపథ్యంలో, అర్హులైన 552 మందికి నష్టపరిహారం చెల్లించి, తక్షణమే ఇళ్ల స్థలాలకు పట్టాలు మంజూరు చేయాలని డిమాండ్ చేశారు.
సమస్యను వెంటనే పరిష్కరించకపోతే పార్టీలకు అతీతంగా ప్రజాస్వామ్య పద్ధతిలో ఉద్యమాన్ని చేపడతామని హరినాథ్ హెచ్చరించారు. బాధితుల పోరాటానికి మాజీ మంత్రి వడ్డే శోభనాద్రీశ్వరరావు, డాక్టర్ వసుంధర మద్దతు ప్రకటించినట్లు తెలిపారు.
