తిరువూరు అడ్వకేట్ క్లర్క్స్ అసోసియేషన్ నూతన కార్యవర్గం ఏకగ్రీవ ఎన్నిక

తిరువూరు: తిరువూరు అడ్వకేట్ క్లర్క్స్ అసోసియేషన్ నూతన కార్యవర్గ ఎంపిక ఏకగ్రీవంగా జరిగింది. అసోసియేషన్ అధ్యక్షుడిగా ఇనపనూరి నాగరాజు, కార్యదర్శిగా బొగ్గుల వెంకటరెడ్డి ఏకగ్రీవంగా ఎన్నికయ్యారు. ఈ సందర్భంగా నూతన అధ్యక్షుడు ఇనపనూరి నాగరాజు మాట్లాడుతూ 2014లో అడ్వకేట్ క్లర్క్‌గా తన ప్రస్థానాన్ని ప్రారంభించానని, అప్పటి నుంచి ఇప్పటివరకు అసోసియేషన్ కార్యదర్శిగా బాధ్యతలు నిర్వహించానని తెలిపారు. తనపై నమ్మకం ఉంచి అధ్యక్ష పదవిని అప్పగించిన సంఘ సభ్యులకు, తోటి మిత్రులకు హృదయపూర్వక కృతజ్ఞతలు తెలియజేశారు. సంఘం పట్ల తనకున్న నిబద్ధత, ఓర్పు, సహచరుల సహకారంతో ఈ బాధ్యతాయుతమైన పదవి దక్కిందని పేర్కొన్నారు. అధ్యక్షుడిగా తనపై ఉంచిన నమ్మకాన్ని నిలబెట్టుకుంటూ సంఘ అభివృద్ధికి, సభ్యుల సంక్షేమానికి కృషి చేస్తానని తెలిపారు. నూతన కార్యవర్గ ఎన్నిక పట్ల పలువురు సభ్యులు హర్షం వ్యక్తం చేస్తూ అధ్యక్ష, కార్యదర్శులకు అభినందనలు తెలిపారు.