దరఖాస్తులు పెండింగ్‌.. ధ్రువీకరణ పత్రాల జారీలో జాప్యం
దరఖాస్తులు పెండింగ్‌.. ధ్రువీకరణ పత్రాల జారీలో జాప్యం తిరువూరు తహసీల్దార్‌కు వైసీపీ నియోజకవర్గ ఇన్‌చార్జి నల్లగట్ల స్వామిదాస్ ఫిర్యాదు
తిరువూరు: దరఖాస్తులు సమర్పించి రోజులు గడుస్తున్నా ప్రజలకు కుల, ఆదాయ, ఇతర ధ్రువీకరణ పత్రాలు సకాలంలో అందడం లేదని వైసీపీ నియోజకవర్గ ఇన్‌చార్జి నల్లగట్ల స్వామిదాస్ తిరువూరు తహసీల్దార్ చంద్రమౌళికి ఫిర్యాదు చేశారు. ధ్రువీకరణ పత్రాల కోసం దరఖాస్తు చేసుకున్న ప్రజలు వాటి జారీ కోసం ఎదురుచూడాల్సి వస్తోందని ఆయన పేర్కొన్నారు.
ప్రభుత్వం ప్రజలకు అందించాల్సిన కుల, ఆదాయ, ఇతర ధ్రువీకరణ పత్రాలను మీ సేవా కేంద్రాలు, గ్రామ సచివాలయాల ద్వారా జారీ చేయాల్సి ఉన్నప్పటికీ, ఆన్‌లైన్‌ సమస్యల కారణంగా అనేక దరఖాస్తులు పెండింగ్‌లో ఉంటున్నాయని తహసీల్దార్ దృష్టికి తీసుకెళ్లారు. ఈ సమస్యను పరిశీలించి, దరఖాస్తుదారులకు ధ్రువీకరణ పత్రాలు సకాలంలో అందేలా చర్యలు తీసుకోవాలని కోరారు.
దీనిపై స్పందించిన తహసీల్దార్ చంద్రమౌళి సమస్యను పరిశీలించి, ధ్రువీకరణ పత్రాల జారీలో జాప్యం లేకుండా చూస్తామని తెలిపారు.
ఈ కార్యక్రమంలో వైసీపీ నాయకులు కాలసాని నాగేశ్వరరావు, పరసా శ్రీనివాసరావు, వెలుగోటి ఆదినారాయణ, రామవరపు ప్రసాదు, పరస నెహ్రూ తదితరులు పాల్గొన్నారు.
