గాంధీ జయంతి వేడుకల్లో పరిశుభ్రతపై అవగాహన: పేరవాండ్లపల్లిలో ఘనంగా గ్రామసభ

శ్రీ సత్యసాయి జిల్లా అమడగూరు మండలం పేరవాండ్లపల్లి పంచాయతీలో గాంధీ జయంతిని పురస్కరించుకుని ప్రత్యేక గ్రామసభను ఘనంగా నిర్వహించారు. ఈ సందర్భంగా గ్రామంలో పరిశుభ్రత, చెత్త నిర్వహణపై ప్రజలకు అవగాహన కల్పించారు.

ఈ కార్యక్రమంలో పంచాయతీ కార్యదర్శి మమత మాట్లాడుతూ... ఇళ్లు, వీధుల్లో చెత్తను బయట పారబోస్తే దోమలు, ఈగలు చేరి పిల్లలకు, పెద్దలకు రకరకాల రోగాలు వస్తాయని ఆందోళన వ్యక్తం చేశారు. ఇంటింటికీ వచ్చే చెత్త బండిలోనే చెత్తను వేస్తే గ్రామం శుభ్రంగా ఉండి, అందరూ ఆరోగ్యంగా ఉంటారని చెప్పారు. "చెత్తను బయట పడేస్తే అనారోగ్యం.. సంచిలో వేస్తే ఆరోగ్యం.. అదే చెత్తను వేరు చేసి అమ్మితే ఆదాయం" అంటూ ఆమె ప్రజలకు సులభంగా అర్థమయ్యేలా వివరించారు.

అలాగే దేశానికి స్వాతంత్య్రం తీసుకురావడానికి మహాత్మా గాంధీ చేసిన పోరాటాన్ని, ఆయన చూపిన బాటను ప్రజలందరూ ఎప్పటికీ గుర్తుంచుకోవాలని, ఆయన ఆశయమైన 'స్వచ్ఛ భారత్' సాధనకు ప్రతి ఒక్కరూ కృషి చేయాలని కోరారు.

ఈ గ్రామసభలో ప్రత్యేక అధికారి మోహన్ బాబు, ఈవోపీఆర్‌డీ మల్లికార్జున రెడ్డి, సాంకేతిక సహాయకులు (TA) రామాంజనేయులు, ఫీల్డ్ అసిస్టెంట్ బాబు, పంచాయతీ సిబ్బంది కృష్ణ, లక్ష్మీనరసప్ప, డిజిటల్ అసిస్టెంట్ చెన్నకేశవులు, శ్రీనివాసులు, నరసింహమూర్తిలతో పాటు పెద్ద సంఖ్యలో గ్రామ ప్రజలు పాల్గొని కార్యక్రమాన్ని విజయవంతం చేశారు.