పెనుగొలనులో వీరనారి చాకలి ఐలమ్మ జయంతి వేడుకలు

ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలోని అంగన్వాడీ కేంద్రం వద్ద శనివారం శిరిడీ సాయిబాబా సేవా కమిటీ ఆధ్వర్యంలో వీరనారి చాకలి ఐలమ్మ 131వ జయంతి వేడుకలను ఘనంగా నిర్వహించారు. ఈ సందర్భంగా ఐలమ్మ చిత్రపటానికి పూలమాలలు వేసి నివాళులర్పించారు. అనంతరం జరిగిన సభలో ఆమె పోరాట స్ఫూర్తిని పలువురు కొనియాడారు.

ఉపాధ్యాయురాలు కే. లింగమ్మ మాట్లాడుతూ.. తెలంగాణలో భూస్వామ్య దోపిడీకి వ్యతిరేకంగా చాకలి ఐలమ్మ ధైర్యంగా పోరాడారని తెలిపారు. తన భూమిని లాక్కోవాలని ప్రయత్నించిన దొరల దౌర్జన్యాన్ని ఎదురించి, భూమిపై తన హక్కును కాపాడుకున్న వీరనారిగా ఐలమ్మ చరిత్రలో నిలిచిపోయారని పేర్కొన్నారు. భూమి, వెట్టి చాకిరీ విముక్తి కోసం ఆమె సాగించిన పోరాటం ఎంతోమందికి స్ఫూర్తిదాయకమని అన్నారు.

సాయిబాబా యువజన కమిటీ అధ్యక్షుడు వూటుకూరు యజ్ఞ కృష్ణ మాట్లాడుతూ.. చాకలి ఐలమ్మ పోరాట స్ఫూర్తి, ధైర్యసాహసాలు, అంకితభావాన్ని ప్రతి ఒక్కరూ ఆదర్శంగా తీసుకోవాలని పిలుపునిచ్చారు. అన్యాయాన్ని ఎదుర్కొనే ధైర్యంతో ఆమె సాగించిన పోరాటం నేటి తరానికి కూడా స్ఫూర్తినిస్తుందని అన్నారు.

అనంతరం చిన్నారులు, గ్రామస్తులకు మిఠాయిలు పంచిపెట్టారు. కార్యక్రమంలో శీలం కృష్ణారెడ్డి, దేవర అంజలి, అనంత రాణి, గ్రామస్తులు, చిన్నారులు తదితరులు పాల్గొన్నారు.