చింతలపాడు గాలివాన బాధితులకు నిత్యావసర సరుకులు పంపిణీ

తిరువూరు: ఇటీవల కురిసిన భారీ వర్షాలు, వీచిన బలమైన గాలులకు చింతలపాడు గ్రామంలో పలువురి ఇళ్ల రేకులు ఎగిరిపోయి, గృహాలు దెబ్బతిన్న విషయం తెలిసిందే. ఈ నేపథ్యంలో బాధిత కుటుంబాలను ఆదుకునేందుకు భగవాన్ శ్రీ సత్యసాయి భజన మండలి గంపలగూడెం, విస్సన్నపేట శాఖల ఆధ్వర్యంలో మంగళవారం దుప్పట్లు, నిత్యావసర సరుకులను పంపిణీ చేశారు.

ఈ సందర్భంగా బాధిత కుటుంబాలకు అవసరమైన సరుకులను అందజేసి వారికి అండగా నిలిచారు. కార్యక్రమంలో గంపలగూడెం కన్వీనర్ చారుగుండ్ల కృష్ణారావు, విస్సన్నపేటకు చెందిన రంగారెడ్డి, తిరువూరు సమితి కన్వీనర్ దామెర్ల ప్రభాకర్ రావుతో పాటు భక్త బృందం సభ్యులు పాల్గొన్నారు.