బాలల కలలకు రెక్కలు తొడగాలి: డాక్టర్ రాజకుమార్‌రెడ్డి

పల్లవి కిడ్జ్ పాఠశాలలో ఘనంగా బాలల దినోత్సవ వేడుకలు.. ప్రతిభ కనబరిచిన చిన్నారులకు బహుమతుల ప్రదానం

తుర్కయంజాల్, నవంబర్ 13 (N Today News): చిన్నారుల కలలకు రెక్కలు తొడిగి, వారిలోని సృజనాత్మకతను ప్రోత్సహించాలని భీష్మరాజ్ సేవా సంస్థ అధ్యక్షుడు డాక్టర్ కె. రాజకుమార్‌రెడ్డి అన్నారు. భారత తొలి ప్రధానమంత్రి పండిట్ జవహర్‌లాల్ నెహ్రూ జయంతిని పురస్కరించుకుని తుర్కయంజాల్‌లోని పల్లవి కిడ్జ్ పాఠశాలలో గురువారం బాలల దినోత్సవ వేడుకలను ఘనంగా నిర్వహించారు.

కార్యక్రమం ప్రారంభంలో చాచా నెహ్రూ చిత్రపటానికి అతిథులు, ఉపాధ్యాయులు పూలమాలలు వేసి నివాళులర్పించారు. అనంతరం ముఖ్య అతిథిగా హాజరైన డాక్టర్ కె. రాజకుమార్‌రెడ్డిని పాఠశాల ప్రధానోపాధ్యాయురాలు కవిత శాలువాతో సత్కరించారు. వివిధ పోటీల్లో ప్రతిభ కనబరిచిన విద్యార్థులకు ముఖ్య అతిథి చేతుల మీదుగా బహుమతులు అందజేశారు.

ఈ సందర్భంగా డాక్టర్ రాజకుమార్‌రెడ్డి మాట్లాడుతూ నేటి బాలలే రేపటి దేశ భవిష్యత్తు అని పేర్కొన్నారు. చిన్నారుల చిరునవ్వుల్లోనే ప్రపంచపు అసలైన అందం దాగి ఉందన్నారు. తల్లిదండ్రులు పిల్లలకు కోట్లాది రూపాయల ఆస్తులు ఇవ్వకపోయినా, ఉత్తమ సంస్కారంతో పాటు నాణ్యమైన విద్యను అందిస్తే వారు సమాజానికి, దేశానికి విలువైన ఆస్తిగా ఎదుగుతారని తెలిపారు.

పిల్లల్లో దాగి ఉన్న ఆసక్తి, సృజనాత్మకతను గుర్తించి ప్రోత్సహించాలని సూచించారు. చదువుతో పాటు ఇతర రంగాల్లోనూ తమ ప్రతిభను చాటుకునేలా చిన్నారులకు అవకాశాలు కల్పించాలని తల్లిదండ్రులు, ఉపాధ్యాయులకు పిలుపునిచ్చారు. పిల్లలు ఆత్మవిశ్వాసంతో ముందుకు సాగేందుకు ప్రోత్సాహం అందించడం ఎంతో ముఖ్యమని చెప్పారు.

పాఠశాల ప్రధానోపాధ్యాయురాలు కవిత మాట్లాడుతూ తమ ఆహ్వానాన్ని మన్నించి కార్యక్రమానికి హాజరై విద్యార్థులను ప్రోత్సహించిన డాక్టర్ రాజకుమార్‌రెడ్డికి కృతజ్ఞతలు తెలిపారు. భీష్మరాజ్ సేవా సంస్థ నిర్వహిస్తున్న సేవా కార్యక్రమాలు అభినందనీయమని పేర్కొన్నారు.

వేడుకల్లో భాగంగా చిన్నారులు వివిధ వేషధారణలతో అలరించడంతో పాటు నృత్యాలు, సాంస్కృతిక ప్రదర్శనలు నిర్వహించారు. విద్యార్థుల ప్రదర్శనలు, ఉత్సాహభరితమైన కార్యక్రమాలు అందరినీ ఆకట్టుకున్నాయి. ఈ వేడుకల్లో ఉపాధ్యాయ బృందం, విద్యార్థులు, తల్లిదండ్రులు, భీష్మరాజ్ సేవా సంస్థ సభ్యులు తదితరులు పాల్గొన్నారు.