రామచంద్రపురంలో నిలిచిన జాతీయ రహదారి పనులు.. వేగవంతం చేయాలని కలెక్టర్ ఆదేశం

ఎన్టీఆర్ జిల్లా: ఏ.కొండూరు మండలం రామచంద్రపురం పరిధిలో జరుగుతున్న ఎన్‌హెచ్‌-30 జాతీయ రహదారి విస్తరణ పనులను జిల్లా కలెక్టర్ డా. జి. లక్ష్మీ శా పరిశీలించారు. ఎమ్మెల్యే కొలికపూడి శ్రీనివాసరావుతో కలిసి రహదారి విస్తరణ పనుల పురోగతిని కలెక్టర్ పరిశీలించారు.

రామచంద్రపురం పరిధిలో సుమారు కిలోమీటరు మేర రహదారి నిర్మాణ పనులు నిలిచిపోవడంతో ప్రజలు, వాహనదారులు ఎదుర్కొంటున్న ఇబ్బందులను కలెక్టర్ అడిగి తెలుసుకున్నారు. పనులు నిలిచిపోవడానికి గల కారణాలను అధికారులను అడిగి తెలుసుకుని, సమస్యలను సమన్వయంతో పరిష్కరించి రహదారి నిర్మాణాన్ని త్వరితగతిన పూర్తి చేయాలని ఆదేశించారు.

రహదారి విస్తరణలో స్థలాలు కోల్పోతున్న బాధితులతో కలెక్టర్ ముఖాముఖిగా మాట్లాడి వారి సమస్యలను అడిగి తెలుసుకున్నారు. బాధితులు ఎదుర్కొంటున్న ఇబ్బందులను సంబంధిత అధికారుల దృష్టికి తీసుకెళ్లి పరిష్కారానికి చర్యలు చేపట్టాలని సూచించారు.

జాతీయ రహదారి విస్తరణ పనులను వేగవంతం చేసి ప్రజలకు, వాహనదారులకు ఇబ్బందులు లేకుండా నిర్మాణాన్ని పూర్తి చేయాలని అధికారులను కలెక్టర్ ఆదేశించారు. సంబంధిత శాఖల అధికారులు పరస్పర సమన్వయంతో పనిచేసి పనులను నిర్దేశిత సమయంలో పూర్తి చేయాలని సూచించారు.