భవన నిర్మాణ పనులను వేగవంతం చేయాలి

నిర్ణీత గడువులోగా మహిళా సమాఖ్య భవనాలు, కమ్యూనిటీ శానిటరీ కాంప్లెక్స్‌ల నిర్మాణాలు పూర్తి చేయాలి: ఎంపీడీవో వి. అద్వైత

ఖానాపూర్, నవంబర్ 13: గ్రామాల్లో చేపట్టిన మహిళా సమాఖ్య భవనాలు, కమ్యూనిటీ శానిటరీ కాంప్లెక్స్‌ల నిర్మాణ పనులను వేగవంతం చేసి నిర్ణీత గడువులోగా పూర్తి చేయాలని ఎంపీడీవో వి. అద్వైత సూచించారు. నిర్మాణ పనుల్లో జాప్యం లేకుండా సంబంధిత అధికారులు, గ్రామ పంచాయతీ ప్రతినిధులు సమన్వయంతో పనిచేయాలని ఆదేశించారు.

ఈ సందర్భంగా శుక్రవారం ఖానాపూర్ మండలంలోని అశోక్‌నగర్, రంగాపూర్, ధర్మారావుపేట గ్రామాల్లో ఎంపీడీవో పర్యటించారు. ఆయా గ్రామాల్లోని మహిళా సమాఖ్య భవనాల వద్ద కమ్యూనిటీ శానిటరీ కాంప్లెక్స్‌ల నిర్మాణాల కోసం స్థలాలను పరిశీలించి, నిర్మాణాలకు సంబంధించి మార్కింగ్‌లు ఇచ్చారు. అదేవిధంగా ధర్మారావుపేట హైస్కూల్ సమీపంలో నిర్మాణంలో ఉన్న కమ్యూనిటీ శానిటరీ కాంప్లెక్స్ పనుల పురోగతిని పరిశీలించారు.

అనంతరం ఎంపీడీవో మాట్లాడుతూ.. మహిళా సమాఖ్య భవనాలతో పాటు కమ్యూనిటీ శానిటరీ కాంప్లెక్స్‌ల నిర్మాణాలను నిర్దేశించిన గడువులోగా పూర్తి చేయాలని తెలిపారు. నిర్మాణ పనులకు సంబంధించిన మెటీరియల్ చెల్లింపులు 15 రోజుల్లోపు జరిగే అవకాశం ఉన్నందున, ఈ అవకాశాన్ని సద్వినియోగం చేసుకోవాలని సూచించారు.

గ్రామాల్లో పెండింగ్‌లో ఉన్న వీబీజీ రామ్‌జీ, జలసిరి పనులను కూడా వేగవంతం చేయాలని అన్నారు. అన్ని గ్రామాల సర్పంచులు ప్రత్యేక చొరవ తీసుకొని తమ పరిధిలో జరుగుతున్న అభివృద్ధి పనుల పురోగతిని ఎప్పటికప్పుడు పర్యవేక్షించాలని సూచించారు. పనులు సకాలంలో పూర్తయ్యేలా అవసరమైన చర్యలు తీసుకోవాలని ఎంపీడీవో స్పష్టం చేశారు.