పెనుగొలనులో వైభవంగా ప్రారంభమైన దసరా ఉత్సవాలు

బాలా త్రిపురసుందరి దేవిగా పార్వతి అమ్మవారి దర్శనం.. మెట్టగుట్టలో ఆదిలక్ష్మి అలంకరణ

ఎన్టీఆర్ జిల్లా, తిరువూరు నియోజకవర్గం, గంపలగూడెం మండలం పెనుగొలను గ్రామంలో దసరా శరన్నవరాత్రి ఉత్సవాలు ఆదివారం వైభవంగా ప్రారంభమయ్యాయి. గ్రామంలోని శ్రీ గంగా పార్వతీ సమేత రామలింగేశ్వర స్వామి ఆలయంతో పాటు గ్రామ సరిహద్దులోని మెట్టగుట్ట శేషాచల శ్రీనివాస స్వామి ఆలయంలోనూ ఉత్సవాలకు శ్రీకారం చుట్టారు. పది రోజుల పాటు జరిగే ఉత్సవాల్లో భాగంగా ఆలయాల్లో ప్రత్యేక పూజలు, హోమాలు, అమ్మవారి అలంకరణలు, అన్నదాన కార్యక్రమాలు నిర్వహించేందుకు ఏర్పాట్లు చేశారు.

రామలింగేశ్వర స్వామి ఆలయంలో ప్రత్యేక పూజలు

పెనుగోలనులోని శ్రీ గంగా పార్వతీ సమేత రామలింగేశ్వర స్వామి ఆలయంలో దసరా ఉత్సవాల తొలిరోజు పార్వతి అమ్మవారు శ్రీ బాలా త్రిపురసుందరి దేవి రూపంలో భక్తులకు దర్శనమిచ్చారు. ఆలయ అర్చకులు దాములూరి సత్యనారాయణ శర్మ ఆధ్వర్యంలో అఖండ దీపారాధన, కుంకుమ పూజలు నిర్వహించారు. వేద పండితులు సుబ్రహ్మణ్య శాస్త్రి వేదమంత్రాల పారాయణం మధ్య ఆలయ గోపుర శిఖరానికి ప్రత్యేక పూజలు చేశారు. అనంతరం గణపతి హోమాన్ని వైభవంగా నిర్వహించారు. పలువురు దంపతులు హోమంలో పాల్గొని ప్రత్యేక పూజలు చేశారు.

ఉత్సవాల ప్రారంభానికి ముందు ఆలయ కమిటీ ఆధ్వర్యంలో గ్రామదేవత ముత్యాలమ్మకు కావిడి సేవ నిర్వహించారు. మేళతాళాల నడుమ జరిగిన ఈ కార్యక్రమంలో భక్తులు పాల్గొన్నారు. భక్తుల సహకారంతో అన్నదాన కార్యక్రమాన్ని ఏర్పాటు చేసినట్లు నిర్వాహకులు వూటుకూరు నారాయణరావు తెలిపారు.

మెట్టగుట్టలో ఆదిలక్ష్మి అలంకరణ

పెనుగొలను గ్రామ సరిహద్దులోని మెట్టగుట్ట శేషాచల శ్రీనివాస స్వామి ఆలయంలోనూ దసరా ఉత్సవాలు ఆదివారం ఘనంగా ప్రారంభమయ్యాయి. ఉత్సవాల తొలిరోజు అమ్మవారిని ఆదిలక్ష్మి రూపంలో అలంకరించి ప్రత్యేక పూజలు నిర్వహించారు. దసరా ఉత్సవాలు పది రోజుల పాటు కొనసాగనున్న నేపథ్యంలో భక్తుల సహకారంతో ప్రతిరోజూ అన్నదాన కార్యక్రమాన్ని నిర్వహించనున్నట్లు ఆలయ కమిటీ చైర్మన్ పంది వెంకటరావు తెలిపారు.

దసరా ఉత్సవాల ప్రారంభంతో పెనుగొలనం ఆధ్యాత్మిక సందడి నెలకొంది. ఆలయాల్లో ప్రత్యేక పూజలు, అమ్మవారి అలంకరణలు, అన్నదాన కార్యక్రమాల ద్వారా భక్తులు దైవదర్శనం చేసుకుంటూ ఉత్సవాల్లో పాల్గొంటున్నారు.