భర్త మందలించడంతో మనస్తాపం.. వివాహిత ఆత్మహత్య

హనుమకొండ జిల్లా ఐనవోలు (ఎన్ టుడే న్యూస్):

హనుమకొండ జిల్లా ఐనవోలు మండలంలో ఆదివారం విషాద ఘటన చోటుచేసుకుంది. ఇంటి పనులు చేయకుండా ఫోన్‌లో మాట్లాడుతున్నావంటూ భర్త మందలించడంతో మనస్తాపానికి గురైన ఓ వివాహిత ఆత్మహత్యకు పాల్పడింది. ఈ ఘటన స్థానికంగా విషాదాన్ని నింపింది.

పోలీసులు తెలిపిన వివరాల ప్రకారం.. బిహార్‌కు చెందిన గౌతమ్ పాశ్వాన్, రాధాకుమారి (20) దంపతులు ఉపాధి కోసం నాలుగేళ్ల క్రితం ఐనవోలుకు వలస వచ్చారు. ఆదివారం ఇంటి పనులు చేయకుండా ఫోన్‌లో మాట్లాడుతున్నావంటూ భర్త గౌతమ్ పాశ్వాన్ రాధాకుమారిని మందలించినట్లు సమాచారం. దీంతో ఆమె తీవ్ర మనస్తాపానికి గురైంది.

అనంతరం ఇంట్లో ఎవరూ లేని సమయంలో ఉరేసుకుని ఆత్మహత్యకు పాల్పడినట్లు తెలిసింది. ఈ ఘటనపై భర్త గౌతమ్ పాశ్వాన్ ఇచ్చిన ఫిర్యాదు మేరకు పోలీసులు కేసు నమోదు చేశారు. ఘటనకు సంబంధించిన పూర్తి వివరాలపై దర్యాప్తు చేపట్టారు.