పెనుగొలనులో చిన్నారులు, విద్యార్థులకు నులిపురుగుల నివారణ మాత్రల పంపిణీ

చేతుల పరిశుభ్రతపై అవగాహన కల్పించిన ఆరోగ్య సిబ్బంది

ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలో ఆరోగ్య శాఖ ఆధ్వర్యంలో సోమవారం చిన్నారులు, విద్యార్థులకు నులిపురుగుల నివారణ కోసం అల్బెండజోల్ మాత్రలను పంపిణీ చేశారు. గ్రామంలోని అంగన్వాడీ కేంద్రాల్లో చిన్నారులకు, ప్రాథమిక పాఠశాలలో విద్యార్థులకు మాత్రలను అందజేశారు.

అనంతరం చేతుల పరిశుభ్రతపై ఆరోగ్య సిబ్బంది అవగాహన కల్పించారు. చేతులను సబ్బుతో శుభ్రంగా కడుక్కోవడం ద్వారా డయేరియా, శ్వాసకోశ ఇన్ఫెక్షన్లు, చర్మ వ్యాధులు వంటి అనారోగ్య సమస్యలను నివారించవచ్చని తెలిపారు. మనం వివిధ వస్తువులను తాకడం ద్వారా చేతులపై చేరే హానికరమైన బ్యాక్టీరియా, వైరస్‌లను సబ్బుతో చేతులు కడుక్కోవడం ద్వారా తొలగించవచ్చని వివరించారు.

భోజనం చేయడానికి ముందు, మరుగుదొడ్లు ఉపయోగించిన తర్వాత, చిన్నారులు, విద్యార్థులు ఆటలు ఆడిన అనంతరం తప్పనిసరిగా సబ్బుతో చేతులను శుభ్రంగా కడుక్కోవాలని సూచించారు. వ్యక్తిగత పరిశుభ్రత పాటించడం ద్వారా అనేక వ్యాధులను దూరంగా ఉంచవచ్చని తెలిపారు.

ఈ కార్యక్రమంలో కమ్యూనిటీ హెల్త్ ఆఫీసర్ షేక్ సుల్తానా, ఏఎన్‌ఎం రత్నమాల, ఉపాధ్యాయురాలు కే. లింగమ్మ, ఆశా కార్యకర్తలు, ఆరోగ్య సిబ్బంది తదితరులు పాల్గొన్నారు.