మృతుడని వైద్యుల నిర్ధారణ.. అంత్యక్రియలకు తరలిస్తుండగా లేచి కూర్చున్న వృద్ధుడు
చందుర్తి: వైద్యులు మృతి చెందినట్లు నిర్ధారించిన ఓ వృద్ధుడు అంత్యక్రియల కోసం అంబులెన్స్లో తరలిస్తుండగా అకస్మాత్తుగా లేచి కూర్చున్న ఘటన రాజన్న సిరిసిల్ల జిల్లా చందుర్తి మండలం సనుగుల గ్రామంలో చోటుచేసుకుంది. ఈ ఘటన స్థానికంగా చర్చనీయాంశంగా మారింది.
సనుగుల గ్రామానికి చెందిన చీకటి శంకరయ్య కొంతకాలంగా అనారోగ్యంతో బాధపడుతూ కరీంనగర్లోని ఓ ప్రైవేట్ ఆస్పత్రిలో చికిత్స పొందుతున్నట్లు కుటుంబ సభ్యులు తెలిపారు. శనివారం శంకరయ్య మృతి చెందినట్లు వైద్యులు కుటుంబ సభ్యులకు సమాచారం అందించారు.
దీంతో కుటుంబ సభ్యులు అంత్యక్రియల కోసం శంకరయ్య మృతదేహాన్ని అంబులెన్స్లో స్వగ్రామానికి తరలిస్తున్నారు. జోగాపూర్ సమీపంలో అంబులెన్స్లో ఉన్న శంకరయ్య అకస్మాత్తుగా లేచి కూర్చోవడంతో కుటుంబ సభ్యులు ఆశ్చర్యానికి గురయ్యారు.
వెంటనే ఆయనను వేములవాడలోని ఓ ప్రైవేట్ ఆస్పత్రికి తరలించి వైద్యులతో పరీక్షలు చేయించారు. పరీక్షించిన వైద్యులు శంకరయ్య ఆరోగ్య పరిస్థితి ప్రస్తుతం నిలకడగా ఉందని తెలిపినట్లు కుటుంబ సభ్యులు పేర్కొన్నారు.
తండ్రి మృతి చెందినట్లు సమాచారం అందడంతో గల్ఫ్లో ఉన్న కుమారులు స్వగ్రామానికి బయల్దేరినట్లు తెలిసింది. అయితే శంకరయ్య బతికే ఉన్నాడని తెలియడంతో కుటుంబ సభ్యుల్లో ఆనందం, ఆశ్చర్యం వ్యక్తమైంది.
ఈ విషయం గ్రామంలో తెలియడంతో శంకరయ్యను చూసేందుకు గ్రామస్థులు పెద్ద సంఖ్యలో తరలివచ్చారు. ఘటనకు సంబంధించిన పూర్తి వివరాలు తెలియాల్సి ఉంది.
