పోతననగర్‌లో పది రోజులుగా తాగునీటి పైపులైన్‌ లీకేజీ

మురుగు కాలువల్లోకి వృథాగా పోతున్న విలువైన నీరు.. పట్టించుకోవడం లేదంటూ స్థానికుల ఆగ్రహం

వరంగల్‌: నగరంలోని పోతననగర్‌ రహదారిపై తాగునీటి పైపులైన్‌ లీకేజీ సమస్య స్థానికులను ఇబ్బందులకు గురిచేస్తోంది. గత పది రోజులుగా పైపులైన్‌ నుంచి మంచినీరు నిరంతరంగా లీకవుతూ మురుగు కాలువల్లోకి చేరుతోంది. దీంతో విలువైన తాగునీరు వృథా అవుతున్నా సంబంధిత అధికారులు స్పందించడం లేదని స్థానికులు ఆవేదన వ్యక్తం చేస్తున్నారు.

ఇదే ప్రాంతంలో గతంలో మరోచోట పైపులైన్‌ లీకేజీ ఏర్పడటంతో అధికారులు మరమ్మతులు చేపట్టారు. అయితే తాజాగా అదే రహదారిపై మరోచోట పైపులైన్‌ లీకవుతుండటంతో సమస్య మళ్లీ మొదటికి వచ్చినట్లయింది. గత పది రోజులుగా నీరు వృథాగా ప్రవహిస్తున్నా మరమ్మతులు చేపట్టకపోవడంపై స్థానికులు అసహనం వ్యక్తం చేస్తున్నారు.

ఒకవైపు నీటిని పొదుపుగా వినియోగించాలని ప్రభుత్వం ప్రజలకు సూచిస్తుండగా, మరోవైపు పైపులైన్‌ లీకేజీల ద్వారా తాగునీరు వృథా అవుతున్నా అధికారులు అరికట్టేందుకు చర్యలు తీసుకోవడం లేదని వారు విమర్శిస్తున్నారు. ప్రజలకు నీటి పొదుపుపై అవగాహన కల్పించడంతో పాటు, ఇలాంటి లీకేజీలను గుర్తించి వెంటనే మరమ్మతులు చేపట్టాల్సిన బాధ్యత అధికారులపై ఉందని పేర్కొంటున్నారు.

సంబంధిత అధికారులు వెంటనే స్పందించి పోతననగర్‌ రహదారిపై లీకవుతున్న పైపులైన్‌కు మరమ్మతులు చేపట్టి తాగునీటి వృథాను అరికట్టాలని స్థానికులు కోరుతున్నారు.