రాఘవపురంలో నాలుగు రోజులుగా తాగునీటి సరఫరా బంద్ మంచినీటి కోసం గ్రామస్తుల అవస్థలు..

అధికారుల నిర్లక్ష్యంపై ఆగ్రహం స్పందించకపోతే ధర్నాకు దిగుతామంటున్న గ్రామస్థులు చింతలపూడి, నవంబర్ 10: ఏలూరు జిల్లా చింతలపూడి మండలం రాఘవపురం హరిజనవాడలో గత నాలుగు రోజులుగా మంచినీటి సరఫరా నిలిచిపోవడంతో గ్రామస్తులు తీవ్ర ఇబ్బందులు ఎదుర్కొంటున్నారు. కనీస అవసరాలకు కూడా నీరు అందకపోవడంతో తాగునీటి కోసం దూర ప్రాంతాలకు వెళ్లాల్సిన దుస్థితి నెలకొంది. ముఖ్యంగా చిన్నపిల్లలు, వృద్ధులు మంచినీటి కోసం పడుతున్న ఇబ్బందులు వర్ణనాతీతంగా ఉన్నాయని స్థానికులు ఆవేదన వ్యక్తం చేస్తున్నారు. నిత్యావసరమైన తాగునీటి సమస్య పరిష్కారానికి అధికారులు తక్షణ చర్యలు తీసుకోవాల్సి ఉన్నప్పటికీ, నాలుగు రోజులుగా సరఫరా పునరుద్ధరణ కాకపోవడంపై గ్రామస్తులు తీవ్ర అసహనం వ్యక్తం చేస్తున్నారు. సమస్యను అధికారుల దృష్టికి పలుమార్లు తీసుకెళ్లినా ఎలాంటి స్పందన లేకపోవడంతో ప్రజల్లో ఆగ్రహం పెరుగుతోంది. ప్రజల ప్రాథమిక అవసరమైన తాగునీటిని సైతం అందించలేని పరిస్థితిపై గ్రామస్థులు మండిపడుతున్నారు. ఇప్పటికైనా సంబంధిత అధికారులు స్పందించి వెంటనే మంచినీటి సరఫరాను పునరుద్ధరించాలని డిమాండ్ చేస్తున్నారు. సమస్యను తక్షణమే పరిష్కరించకపోతే గ్రామస్తులంతా ఏకమై ధర్నా చేపడతామని హెచ్చరిస్తున్నారు.