ఎంపీటీసీ, జడ్పీటీసీ ఓట్ల లెక్కింపునకు పటిష్ట ఏర్పాట్లు చేయాలి

కొత్తపేట డివిజన్‌లో 145 ఎంపీటీసీ స్థానాలకు కౌంటింగ్ ప్రణాళిక సిద్ధం.. అధికారులకు కలెక్టర్ ఆదేశాలు

కొత్తపేట (ఎన్ టుడే న్యూస్):

డాక్టర్ బి.ఆర్. అంబేద్కర్ కోనసీమ జిల్లా కొత్తపేట డివిజన్ పరిధిలో ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రక్రియకు అవసరమైన అన్ని ఏర్పాట్లను ముందుగానే పూర్తి చేయాలని జిల్లా కలెక్టర్ డా. ఆర్. మహేష్ కుమార్ అధికారులను ఆదేశించారు. కౌంటింగ్ ప్రక్రియ పారదర్శకంగా, నిష్పక్షపాతంగా, ప్రశాంత వాతావరణంలో జరిగేలా సంబంధిత శాఖల అధికారులు సమన్వయంతో పనిచేయాలని సూచించారు.

కొత్తపేట డివిజన్ పరిధిలోని రావులపాలెం, కొత్తపేట, ఆత్రేయపురం, ఆలమూరు, పి. గన్నవరం, అయినవిల్లి, అంబాజీపేట మండలాలకు సంబంధించి మొత్తం 145 ఎంపీటీసీ స్థానాల ఓట్ల లెక్కింపునకు అవసరమైన ప్రణాళిక రూపొందించినట్లు కలెక్టర్ తెలిపారు. ఆయా మండలాలకు సంబంధించి స్ట్రాంగ్ రూములు, కౌంటింగ్ హాళ్లను ప్రభుత్వ భవనాలు, విద్యాసంస్థల్లో గుర్తించి కేటాయించినట్లు వెల్లడించారు.

కౌంటింగ్ హాళ్లలో టేబుళ్ల కేటాయింపుల వివరాలను కలెక్టర్ వివరిస్తూ, మొదటి కౌంటింగ్ హాల్‌లో 88 టేబుళ్లు, రెండో కౌంటింగ్ హాల్‌లో 28 టేబుళ్లు, మూడో కౌంటింగ్ హాల్‌లో 20 టేబుళ్లు ఏర్పాటు చేయనున్నట్లు తెలిపారు. మొత్తం 136 టేబుళ్లతో ఓట్ల లెక్కింపు నిర్వహణకు ప్రణాళిక సిద్ధం చేసినట్లు పేర్కొన్నారు.

కౌంటింగ్‌కు అవసరమైన గదులు, టేబుళ్లు, విద్యుత్ సదుపాయం, తాగునీరు, పారిశుధ్యం, సిబ్బంది నియామకాలకు సంబంధించిన ఏర్పాట్లను సంబంధిత అధికారులు క్షేత్రస్థాయిలో పరిశీలించి పూర్తి చేయాలని ఆదేశించారు. ఎలాంటి ఇబ్బందులు తలెత్తకుండా అన్ని మౌలిక సదుపాయాలు అందుబాటులో ఉంచాలని సూచించారు.

స్ట్రాంగ్ రూముల వద్ద పటిష్టమైన పోలీసు భద్రత ఏర్పాటు చేయాలని, కౌంటింగ్ కేంద్రాల ప్రవేశ, నిష్క్రమణ మార్గాలపై నియంత్రణ ఉండాలని కలెక్టర్ స్పష్టం చేశారు. అనుమతి కలిగిన వ్యక్తులను మాత్రమే గుర్తింపు కార్డుల ఆధారంగా కౌంటింగ్ కేంద్రాల్లోకి అనుమతించాలని ఆదేశించారు. ఎన్నికల ప్రవర్తనా నియమావళిని కచ్చితంగా అమలు చేయాలని, ఓట్ల లెక్కింపు అనంతరం ఫలితాల నేపథ్యంలో ఎలాంటి అవాంఛనీయ సంఘటనలు చోటుచేసుకోకుండా పోలీసు అధికారులు ప్రత్యేక నిఘా ఏర్పాటు చేయాలని సూచించారు.

కౌంటింగ్ ప్రక్రియలో పారదర్శకత, నిష్పక్షపాత వైఖరికి ప్రాధాన్యత ఇవ్వాలని కలెక్టర్ తెలిపారు. ఎన్నికల, రెవెన్యూ, పోలీసు శాఖల అధికారులు పరస్పర సమన్వయంతో విధులు నిర్వహించి ఓట్ల లెక్కింపును ప్రశాంతంగా, ఎలాంటి ఆటంకాలు లేకుండా పూర్తి చేయాలని ఆదేశించారు.