ఆర్టీసీ బస్సు ఢీకొని ఇంజినీరింగ్ విద్యార్థి మృతి..యువతికి తీవ్ర గాయాలు

ఘట్కేసర్ (N Today News): ఆర్టీసీ బస్సు ఢీకొన్న ఘటనలో ఓ ఇంజినీరింగ్ విద్యార్థి మృతి చెందగా, మరో యువతి తీవ్రంగా గాయపడిన ఘటన పోచారం ఐటీ కారిడార్ పోలీస్ స్టేషన్ పరిధిలోని యన్నంపేట వంతెనపై శనివారం చోటుచేసుకుంది.

స్థానికుల కథనం ప్రకారం.. నాగర్‌కర్నూల్ జిల్లా తిప్పారెడ్డిపల్లి గ్రామానికి చెందిన కిషోర్ (20) బి.ఎన్.రెడ్డి నగర్‌లో నివాసం ఉంటూ ఇబ్రహీంపట్నంలోని సెయింట్ ఇంజినీరింగ్ కళాశాలలో బీటెక్ మూడో సంవత్సరం చదువుతున్నాడు.

శనివారం తన బంధువు విజయను పరీక్ష రాసేందుకు యన్నంపేటలోని శ్రీనిధి ఇంజినీరింగ్ కళాశాలకు మోటార్‌సైకిల్‌పై తీసుకెళ్తుండగా యన్నంపేట వంతెనపై ఆర్టీసీ బస్సు ఢీకొట్టినట్లు సమాచారం. ఈ ప్రమాదంలో కిషోర్ తీవ్రంగా గాయపడి అక్కడికక్కడే మృతి చెందగా.. విజయ తీవ్రంగా గాయపడింది.

ప్రమాదంపై సమాచారం అందుకున్న పోచారం ఐటీ కారిడార్ పోలీసులు వెంటనే ఘటనాస్థలానికి చేరుకున్నారు. గాయపడిన విజయను మేడిపల్లిలోని ఓ ప్రైవేట్ ఆస్పత్రికి తరలించి చికిత్స అందిస్తున్నారు. మృతుడు కిషోర్ మృతదేహాన్ని గాంధీ ఆస్పత్రి మార్చురీకి తరలించారు.

ఈ ఘటనపై పోచారం ఐటీ కారిడార్ పోలీసులు కేసు నమోదు చేసి ప్రమాదానికి గల కారణాలపై దర్యాప్తు చేస్తున్నారు. ప్రమాదానికి సంబంధించి పూర్తి వివరాలు పోలీసుల దర్యాప్తులో వెల్లడికావాల్సి ఉంది.