ఏలూరులో ఏసీబీ వలలో పర్యావరణ ఇంజినీర్..

లంచం తీసుకుంటూ రెడ్‌హ్యాండెడ్‌గా పట్టుబాటు

ఏలూరు జిల్లా కాలుష్య నియంత్రణ మండలి కార్యాలయంలో అవినీతి నిరోధక శాఖ (ఏసీబీ) అధికారులు మెరుపు దాడి నిర్వహించారు. లంచం తీసుకుంటూ పర్యావరణ ఇంజినీర్ సీతారామచంద్రమూర్తి ఏసీబీ అధికారులకు పట్టుబడినట్లు సమాచారం. తిమ్మాపురంలో గిడ్డంగి ఏర్పాటు చేసేందుకు అవసరమైన నిరభ్యంతర పత్రం (ఎన్‌ఓసీ) జారీ చేయాలంటే లక్ష రూపాయలు లంచంగా ఇవ్వాలని అధికారి డిమాండ్ చేసినట్లు ఆరోపణలు ఉన్నాయి. చివరకు రూ.30 వేల వద్ద బేరం కుదరడంతో బాధితుడు ఏసీబీ అధికారులను ఆశ్రయించినట్లు తెలుస్తోంది. దీంతో పక్కా ప్రణాళికతో రంగంలోకి దిగిన ఏసీబీ అధికారులు, ఏలూరులోని కాలుష్య నియంత్రణ మండలి కార్యాలయంలో లంచం తీసుకుంటున్న సమయంలో అధికారిని రెడ్‌హ్యాండెడ్‌గా పట్టుకున్నట్లు సమాచారం. ప్రభుత్వ కార్యాలయాల్లో ప్రజలకు అందాల్సిన సేవల కోసం లంచాలు డిమాండ్ చేయడం ఆందోళన కలిగిస్తోంది. ప్రభుత్వ విధులను నిర్వర్తించాల్సిన అధికారులే లంచాలకు పాల్పడితే సామాన్య ప్రజలు ఎవరిని ఆశ్రయించాలనే ప్రశ్నలు తలెత్తుతున్నాయి. ఈ ఘటనపై ఏసీబీ అధికారులు తదుపరి విచారణ చేపడుతున్నారు.