పోలీస్ అమరవీరుల సేవలను స్మరిస్తూ విద్యార్థులకు వ్యాసరచన పోటీలు
- సైబర్ నేరాలు, మాదకద్రవ్యాలపై అవగాహన కలిగి ఉండాలి: సీఐ కృష్ణ
- సైబర్ నేరాలు, మాదకద్రవ్యాలపై వ్యాసరచన
- ప్రతిభ కనబరిచిన విద్యార్థులకు బహుమతులు
నిర్మల్ | ఎన్ టుడే న్యూస్‌: దేశ రక్షణ, ప్రజల భద్రత కోసం విధి నిర్వహణలో ప్రాణత్యాగం చేసిన పోలీసు అమరవీరుల సేవలను స్మరించుకుంటూ నిర్మల్ జిల్లా పోలీస్ శాఖ ఆధ్వర్యంలో విద్యార్థులకు వ్యాసరచన పోటీలు నిర్వహించారు. మందులాపూర్ ఉన్నత పాఠశాలలో నిర్వహించిన ఈ పోటీల్లో విద్యార్థులు ఉత్సాహంగా పాల్గొని తమ ప్రతిభను చాటుకున్నారు.
పోలీస్ అమరవీరుల సంస్మరణ దినోత్సవాన్ని పురస్కరించుకుని నిర్వహించిన ఈ కార్యక్రమంలో నిర్మల్ రూరల్ సర్కిల్ ఇన్‌స్పెక్టర్ కృష్ణ మాట్లాడుతూ విద్యార్థులు, యువతలో పోలీసుల సేవలు, త్యాగాలపై అవగాహన కల్పించడంతో పాటు వారిలో సృజనాత్మక రచనా నైపుణ్యాలను ప్రోత్సహించడమే పోటీల ముఖ్య ఉద్దేశమని తెలిపారు.
పోలీసుల త్యాగాలు, ప్రజా భద్రతలో పోలీసుల పాత్ర, సైబర్ నేరాల నివారణలో పోలీసులతో పాటు పౌరుల భాగస్వామ్యం, మాదకద్రవ్యాల నిర్మూలన, సోషల్ మీడియా దుర్వినియోగం వంటి అంశాలపై వ్యాసరచన పోటీలు నిర్వహించారు. తెలుగు, ఇంగ్లీష్, ఉర్దూ భాషల్లో జరిగిన పోటీల్లో విద్యార్థులు చురుకుగా పాల్గొన్నారు.
ఈ సందర్భంగా సీఐ కృష్ణ మాట్లాడుతూ సమాజంలో పెరుగుతున్న సైబర్ నేరాల పట్ల అప్రమత్తంగా ఉండాలని సూచించారు. మాదకద్రవ్యాలకు దూరంగా ఉంటూ ఆరోగ్యకరమైన జీవనశైలిని అలవర్చుకోవాలని విద్యార్థులకు పిలుపునిచ్చారు.
పోటీల్లో ఉత్తమ ప్రతిభ కనబరిచిన విద్యార్థులకు బహుమతులు, ప్రశంసాపత్రాలు అందజేశారు. పోలీసు అమరవీరుల త్యాగాలను స్మరించుకోవడం ప్రతి ఒక్కరి బాధ్యతని పోలీస్ అధికారులు పేర్కొన్నారు. వారి సేవా స్ఫూర్తిని యువత ఆదర్శంగా తీసుకుని దేశం పట్ల బాధ్యతతో వ్యవహరించాలని సూచించారు.
దేశ భద్రత కోసం ప్రాణాలర్పించిన అమరవీరుల త్యాగాలను భావితరాలకు తెలియజేయడంతో పాటు విద్యార్థుల్లో సామాజిక బాధ్యత, దేశభక్తి, చైతన్యం పెంపొందించేందుకు ఇలాంటి కార్యక్రమాలు దోహదపడతాయని నిర్వాహకులు తెలిపారు.
