చేయూత పెన్షన్ దరఖాస్తుల పరిశీలనకు గడువు పొడిగింపు

హైదరాబాద్: చేయూత సామాజిక భద్రత పింఛన్లకు సంబంధించి కొత్తగా వచ్చిన దరఖాస్తుల పరిశీలన గడువును ప్రభుత్వం పొడిగించింది. సెప్టెంబర్ 25 వరకు ఉన్న గడువును సెప్టెంబర్ 30 వరకు పొడిగిస్తూ SERP సీఈఓ దివ్య దేవరాజన్ ఉత్తర్వులు జారీ చేశారు.

ఫీల్డ్ స్థాయి అధికారులు SIR విధులు, వినాయక నిమజ్జన ఏర్పాట్లు, ఇతర ప్రభుత్వ బాధ్యతల్లో నిమగ్నమై ఉండటంతో నిర్ణీత గడువులో దరఖాస్తుల పరిశీలన పూర్తి చేయడం సాధ్యం కావడం లేదని వచ్చిన విజ్ఞప్తుల నేపథ్యంలో గడువు పొడిగించినట్లు ఉత్తర్వుల్లో పేర్కొన్నారు.

రాష్ట్రంలోని అన్ని జిల్లాల కలెక్టర్లు చేయూత కొత్త పింఛన్ దరఖాస్తుల పరిశీలనను సెప్టెంబర్ 30లోగా పూర్తి చేయాలని SERP ఆదేశించింది.

దరఖాస్తుదారులకు ఎలాంటి ఇబ్బందులు కలగకుండా, అర్హత కలిగిన ప్రతి దరఖాస్తును నిబంధనల ప్రకారం క్షుణ్ణంగా పరిశీలించి ప్రక్రియను పూర్తి చేయాలని సంబంధిత అధికారులకు సూచించింది.