పంట ఎండిపోవడంతో రైతు ఆత్మహత్య.. రూ.15 లక్షల అప్పులు

ఆదిలాబాద్: పంటకు సాగునీరు అందక దిగుబడి రాకపోవడంతో అప్పులు తీర్చే మార్గం కనిపించక ఓ రైతు పురుగుల మందు తాగి ఆత్మహత్య చేసుకున్న ఘటన ఆదిలాబాద్ గ్రామీణ మండలం లాండసాంగ్వి గ్రామంలో చోటుచేసుకుంది.

గ్రామానికి చెందిన తీగల రమేష్ (47) తనకు ఉన్న 8 ఎకరాల్లో పత్తి, కంది పంటలు సాగు చేసేందుకు సుమారు రూ.15 లక్షల వరకు అప్పు చేసినట్లు కుటుంబ సభ్యులు తెలిపారు. అయితే పంటకు తగినంత నీరు అందకపోవడంతో పంట దెబ్బతిని ఆశించిన స్థాయిలో దిగుబడి రాలేదని పేర్కొన్నారు.

దీంతో చేసిన అప్పులు ఎలా తీర్చాలో తెలియక రమేష్ తీవ్ర ఆవేదనకు గురైనట్లు కుటుంబ సభ్యులు తెలిపారు. ఈ క్రమంలో పురుగుల మందు తాగి ఆత్మహత్యకు పాల్పడినట్లు సమాచారం.

ఘటనపై పోలీసులు కేసు నమోదు చేసి దర్యాప్తు చేపట్టినట్లు తెలిసింది. రైతు ఆత్మహత్యకు దారితీసిన పరిస్థితులు, అప్పుల వివరాలు తదితర అంశాలపై పోలీసులు విచారణ చేస్తున్నారు.

సాగునీటి సమస్యలు, పంట నష్టాలు, అప్పుల భారం వంటి కారణాలతో రైతులు ఇబ్బందులు ఎదుర్కొంటున్న నేపథ్యంలో బాధిత కుటుంబాన్ని ప్రభుత్వం ఆదుకోవాలని స్థానికులు కోరుతున్నారు.