పంటల సాగులో రైతులు అప్రమత్తంగా ఉండాలి

పంటల సాగులో రైతులు అప్రమత్తంగా ఉండాలి వామకుంట్లలో పొలం పిలుస్తోంది కార్యక్రమం

తిరువూరు మండలం వామకుంట్ల గ్రామంలో జిల్లా వనరుల కేంద్రం (డీఆర్‌సీ), ఎన్టీఆర్ జిల్లా వ్యవసాయ శాఖ ఆధ్వర్యంలో పొలం పిలుస్తోంది కార్యక్రమాన్ని నిర్వహించారు. డీఆర్‌సీ ఏవో కె. పద్మజా రాణి ఆధ్వర్యంలో జరిగిన ఈ కార్యక్రమంలో రైతులకు వరి పంటలో పురుగులు, తెగుళ్ల యాజమాన్యంతో పాటు నీటి యాజమాన్యంపై అవగాహన కల్పించారు. వరి పంటలో పురుగులు, తెగుళ్లను తొలిదశలోనే గుర్తించి తగిన యాజమాన్య పద్ధతులు పాటించాలని వ్యవసాయ అధికారులు సూచించారు. పంటకు అవసరమైన మేరకే నీటిని వినియోగిస్తూ నీటి యాజమాన్యాన్ని సమర్థవంతంగా చేపట్టాలని రైతులకు వివరించారు.

ఈ సందర్భంగా ఏవో పద్మ మాట్లాడుతూ రైతులందరూ తాము సాగు చేసిన పంటలను తప్పనిసరిగా పంట నమోదు చేయించుకోవాలని సూచించారు. పంట నమోదు ప్రక్రియతో పాటు రైతులు ఈ-కేవైసీ కూడా పూర్తి చేసుకోవాలని తెలిపారు. పంటల వివరాలు సక్రమంగా నమోదు చేసుకోవడం ద్వారా ప్రభుత్వ పథకాలు, వ్యవసాయ శాఖ సేవలు పొందేందుకు రైతులకు ప్రయోజనం ఉంటుందని వివరించారు. పంటల సాగులో వ్యవసాయ శాఖ సూచనలు పాటిస్తూ అధిక దిగుబడులు సాధించే దిశగా రైతులు చర్యలు తీసుకోవాలని సూచించారు.

ఈ కార్యక్రమంలో గ్రామ పార్టీ అధ్యక్షులు పంది ముత్యం, ఆర్‌ఎస్‌కే సిబ్బంది, స్థానిక రైతులు పాల్గొన్నారు.