రైతులకు సమగ్ర సేవలు అందించాలి

ఎఫ్‌పీవోల ద్వారా విత్తనాలు, ఎరువులు, పురుగుమందులతో పాటు నాణ్యమైన వ్యవసాయ ఉత్పత్తులు అందించాలి: నాబార్డ్ డీడీఎం సాయిరాం

గంగారం, నవంబర్ 13: రైతులకు అవసరమైన అన్ని రకాల సేవలను ఒకే వేదిక ద్వారా అందించడంతో పాటు, నాణ్యమైన వ్యవసాయ ఉత్పత్తులను అందుబాటులోకి తీసుకురావాలని నాబార్డ్ మహబూబాబాద్ జిల్లా అభివృద్ధి అధికారి (డీడీఎం) సాయిరాం సూచించారు. రైతు ఉత్పత్తిదారుల సంఘాలు (ఎఫ్‌పీవోలు) రైతుల అభ్యున్నతికి దోహదపడేలా సమర్థవంతంగా పనిచేయాలని అన్నారు.

గంగారం మండల కేంద్రంలో శుక్రవారం గంగారం రైతు ఉత్పత్తిదారుల సంఘం ఆధ్వర్యంలో సంఘం డైరెక్టర్లకు శిక్షణా తరగతులు నిర్వహించారు. ఈ కార్యక్రమానికి ముఖ్య అతిథిగా హాజరైన నాబార్డ్ డీడీఎం సాయిరాం మాట్లాడుతూ.. గంగారం వంటి ఏజెన్సీ ప్రాంతంలో రైతు ఉత్పత్తిదారుల సంఘాన్ని ఏర్పాటు చేయడం అభినందనీయమని పేర్కొన్నారు. ఈ సంఘం ద్వారా స్థానిక రైతులకు మెరుగైన సేవలు అందించేందుకు కృషి చేయాలని సూచించారు.

రైతులకు అవసరమైన విత్తనాలు, ఎరువులు, పురుగుమందులను నాణ్యమైనవిగా అందుబాటులో ఉంచాలని తెలిపారు. వ్యవసాయానికి అవసరమైన ఉత్పాదకాల సరఫరాతో పాటు రైతులు పండించిన పంటల ద్వారా నాణ్యమైన ఉత్పత్తులను తయారు చేసి అందించే దిశగా సంఘం పనిచేయాలని సూచించారు. రైతులకు ప్రయోజనం చేకూరేలా సంఘం కార్యకలాపాలను విస్తరించి, వారి అవసరాలకు అనుగుణంగా సేవలు అందించాలని అన్నారు.

ఎఫ్‌పీవో డైరెక్టర్లకు నిర్వహించిన ఈ శిక్షణా కార్యక్రమం ద్వారా సంఘం నిర్వహణ, రైతులకు సేవలందించే విధానం, నాణ్యమైన వ్యవసాయ ఉత్పత్తుల సరఫరాపై అవగాహన కల్పించారు.

ఈ కార్యక్రమంలో సాయి స్వచ్ఛంద సంస్థ సీఈఓ వెంకన్న, గంగారం రైతు ఉత్పత్తిదారుల సంఘం చైర్మన్ బూర్కా యాదగిరి, డైరెక్టర్లు పుల్సం లింగస్వామి, ప్రభాకర్, పెనుక లక్ష్మీనర్సు, జెజ్జరి వసంత, మంజుల తదితరులు పాల్గొన్నారు.