చింతలపూడిలో ముత్యాలమ్మ జాతర సందడి..
విద్యుత్ వెలుగుల్లో అమ్మవారి ఊరేగింపు ప్రత్యేక ఆకర్షణ చింతలపూడి: ముత్యాలమ్మ జాతర మూడో రోజు సందర్భంగా ఆదివారం చింతలపూడి పట్టణంలో పండుగ వాతావరణం నెలకొంది. అమ్మవారి దర్శనం కోసం భక్తులు, జాతరను తిలకించేందుకు ప్రజలు పెద్ద సంఖ్యలో తరలిరావడంతో పట్టణంలోని ప్రధాన వీధులు జనసందోహంతో కిక్కిరిశాయి. వివిధ రకాల వేషధారణలు, డప్పుల మోతలు, సంప్రదాయ కార్యక్రమాలు, రంగురంగుల విద్యుత్ దీపాల అలంకరణలు జాతరకు ప్రత్యేక శోభను తీసుకొచ్చాయి. బెల్లంపేట ముత్యాలమ్మ కమిటీ ఆధ్వర్యంలో నిర్వహించిన వివిధ కార్యక్రమాలు ప్రజలను విశేషంగా ఆకట్టుకున్నాయి. జాతర సందర్భంగా భక్తులు అమ్మవారిని దర్శించుకుని మొక్కులు చెల్లించుకున్నారు. రాత్రివేళ విద్యుత్ దీపాల వెలుగుల్లో సాగిన అమ్మవారి ఊరేగింపు ప్రత్యేక ఆకర్షణగా నిలిచింది. భక్తుల సందడి, డప్పుల శబ్దాలు, వీధులన్నీ అలంకరణలతో కళకళలాడటంతో చింతలపూడి పట్టణమంతా జాతర ఉత్సాహంతో మార్మోగింది. మూడో రోజు వేడుకలు భక్తి, సంప్రదాయం, ఉత్సాహాల సమ్మేళనంగా సాగాయి.
