ఆమడగూరు మండలంలో రూ.13.52 కోట్లతో 57 అభివృద్ధి పనులకు శంకుస్థాపన

ఎమ్మెల్యే పల్లె సింధూరరెడ్డి, మాజీ మంత్రి పల్లె రఘునాథరెడ్డికి ఘన స్వాగతం

ఆమడగూరు, అక్టోబర్‌ 6 (ఎన్‌టుడే న్యూస్‌): పుట్టపర్తి నియోజకవర్గ ఎమ్మెల్యే పల్లె సింధూరరెడ్డి, మాజీ మంత్రి పల్లె రఘునాథరెడ్డి సోమవారం ఆమడగూరు మండలంలో విస్తృతంగా పర్యటించారు. ఈ సందర్భంగా మండలంలో రూ.13.52 కోట్ల అంచనా వ్యయంతో చేపట్టనున్న 57 అభివృద్ధి పనులకు శంకుస్థాపనలు చేశారు.

మండలంలోని వివిధ గ్రామాల్లో ఎమ్మెల్యే, మాజీ మంత్రికి ప్రజలు ఘన స్వాగతం పలికారు. పలుచోట్ల పూల వర్షం కురిపిస్తూ తమ అభిమానాన్ని చాటుకున్నారు.

ప్రజల ఆదరణ ఉత్సాహాన్నిస్తోంది: పల్లె సింధూరరెడ్డి

ఈ సందర్భంగా ఎమ్మెల్యే పల్లె సింధూరరెడ్డి మాట్లాడుతూ.. పుట్టపర్తి నియోజకవర్గంలోని ప్రతి గ్రామంలో పర్యటిస్తున్నప్పుడు ప్రజల నుంచి లభిస్తున్న ఆదరణ, ఆప్యాయత ఎంతో ఉత్సాహాన్ని కలిగిస్తున్నాయని అన్నారు. రానున్న స్థానిక సంస్థల ఎన్నికల్లో ప్రజలు అభివృద్ధి, సంక్షేమానికి ప్రాధాన్యత ఇస్తారని పేర్కొన్నారు.

పంచాయతీల్లో సర్పంచ్‌లు, ఎంపీటీసీలు, జడ్పీటీసీలతో పాటు మున్సిపల్‌ చైర్మన్‌ తదితర స్థానాల్లో కూటమి అభ్యర్థులను గెలిపించాలని ప్రజలను కోరారు. ప్రధాని నరేంద్ర మోదీ సహకారంతో, ముఖ్యమంత్రి నారా చంద్రబాబు నాయుడు నాయకత్వంలో రాష్ట్రానికి పెట్టుబడులు వస్తున్నాయని తెలిపారు.

పుట్టపర్తి నియోజకవర్గంలో పరిశ్రమలు, ఉపాధి అవకాశాలు పెంచేందుకు ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌, ఐటీ శాఖ మంత్రి నారా లోకేశ్‌ దృష్టికి నియోజకవర్గ అవసరాలను పలుమార్లు తీసుకెళ్లినట్లు చెప్పారు. ఈ కృషికి అనుగుణంగా పుట్టపర్తి ప్రాంతంలో రక్షణ, పారిశ్రామిక రంగాలకు సంబంధించిన భారీ ప్రాజెక్టులు వస్తున్నాయని తెలిపారు.

ఆమడగూరు మండలంలో రిలయన్స్‌ సహకారంతో భారీ సౌర విద్యుత్‌ ప్రాజెక్టు ఏర్పాటుకు చర్యలు జరుగుతున్నాయని పల్లె సింధూరరెడ్డి వెల్లడించారు. ఈ ప్రాజెక్టు ద్వారా మండలంతో పాటు పుట్టపర్తి నియోజకవర్గ అభివృద్ధికి మరింత ఊతం లభిస్తుందని అన్నారు.

193 చెరువులు, రెండు రిజర్వాయర్లకు కృష్ణా జలాలే లక్ష్యం

పుట్టపర్తి నియోజకవర్గ ప్రజల చిరకాల ఆకాంక్ష అయిన 193 చెరువులు, రెండు రిజర్వాయర్లను నీటితో నింపడం తన ప్రధాన లక్ష్యమని ఎమ్మెల్యే తెలిపారు. హంద్రీ–నీవా కాలువ ద్వారా కృష్ణా జలాలను నియోజకవర్గానికి తీసుకువచ్చి ఈ ప్రాంతాన్ని సస్యశ్యామలం చేసేందుకు కృషి చేస్తానని చెప్పారు.

నీటి సమస్యకు శాశ్వత పరిష్కారం లభిస్తే వ్యవసాయం, తాగునీరు, పారిశ్రామిక రంగం మరింత అభివృద్ధి చెందుతాయని పేర్కొన్నారు.

అభివృద్ధికి రూ.2,500 కోట్లకు పైగా ఖర్చు: పల్లె రఘునాథరెడ్డి

మాజీ మంత్రి పల్లె రఘునాథరెడ్డి మాట్లాడుతూ.. ఎమ్మెల్యే పల్లె సింధూరరెడ్డి నాయకత్వంలో గత రెండేళ్లుగా పుట్టపర్తి నియోజకవర్గంలో పెద్ద ఎత్తున అభివృద్ధి కార్యక్రమాలు జరుగుతున్నాయని తెలిపారు. అభివృద్ధి, సంక్షేమ కార్యక్రమాల కోసం నియోజకవర్గంలో రూ.2,500 కోట్లకు పైగా ఖర్చు చేసినట్లు చెప్పారు.

నియోజకవర్గానికి భారీ ప్రాజెక్టులను తీసుకురావడంతో పాటు ప్రజల జీవన ప్రమాణాలను మెరుగుపరిచేలా అనేక కార్యక్రమాలు చేపట్టినట్లు తెలిపారు. 2019 నుంచి 2024 వరకు వైసీపీ ప్రభుత్వ హయాంలో రాష్ట్రంలో అభివృద్ధి ఆశించిన స్థాయిలో జరగలేదని ఆయన విమర్శించారు. ప్రస్తుతం ముఖ్యమంత్రి చంద్రబాబు నాయుడు నాయకత్వంలోని కూటమి ప్రభుత్వం అభివృద్ధి, సంక్షేమానికి ప్రాధాన్యత ఇస్తూ పాలన సాగిస్తోందని అన్నారు.

రానున్న స్థానిక సంస్థల ఎన్నికల్లో ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లి కూటమి అభ్యర్థులకు మద్దతు ఇవ్వాలని పల్లె రఘునాథరెడ్డి కోరారు.

కార్యక్రమంలో రాష్ట్ర డైరెక్టర్లు, ఆమడగూరు మండల ప్రజాప్రతినిధులు, టీడీపీ, బీజేపీ, జనసేన నాయకులు, కార్యకర్తలు, అభిమానులు, అధికారులు, స్థానిక ప్రజలు తదితరులు పాల్గొన్నారు.

రిపోర్టర్‌: రామాంజనేయులు