పెనుగొలనులో గాంధీ, శాస్త్రి జయంతి వేడుకలు

ఎన్టీఆర్ జిల్లా, తిరువూరు నియోజకవర్గం, గంపలగూడెం మండలం పెనుగొలను గ్రామంలోని 99వ అంగన్వాడీ కేంద్రం వద్ద శుక్రవారం మహాత్మా గాంధీ, లాల్ బహదూర్ శాస్త్రి జయంతి వేడుకలను ఘనంగా నిర్వహించారు. ఈ సందర్భంగా ఇరువురి చిత్రపటాలకు పూలమాలలు వేసి నివాళులర్పించారు.

ఈ సందర్భంగా ఉపాధ్యాయురాలు కే. లింగమ్మ మాట్లాడుతూ సత్యం, అహింస అనే ఆయుధాలతో బ్రిటిష్ పాలనను ఎదుర్కొన్న మహాత్మా గాంధీ చూపిన సత్యాగ్రహ మార్గం నేటికీ ప్రపంచ దేశాలకు ఆదర్శంగా నిలుస్తోందని తెలిపారు. గాంధీజీ కలలుగన్న గ్రామ స్వరాజ్యం, స్వచ్ఛభారత్ లక్ష్యాలను సాకారం చేయడమే ఆయనకు మనమిచ్చే ఘనమైన నివాళి అని పేర్కొన్నారు.

శిరిడి సాయిబాబా యువజన సేవా కమిటీ అధ్యక్షుడు వూటుకూరు యజ్ఞ కృష్ణ మాట్లాడుతూ లాల్ బహదూర్ శాస్త్రి ఇచ్చిన “జై జవాన్‌ – జై కిసాన్‌” నినాదం సైనికుల ధైర్యాన్ని, రైతుల శ్రమను దేశ ప్రగతికి కీలకమైన శక్తులుగా చాటిచెప్పిందని కొనియాడారు. నిజాయితీ, నిరాడంబరత, కర్తవ్యనిష్ఠ, దేశభక్తికి ప్రతిరూపంగా నిలిచిన వారి జీవితం నేటి తరానికి ఆదర్శమని తెలిపారు.

అనంతరం చిన్నారులకు మిఠాయిలు పంపిణీ చేశారు. ఈ కార్యక్రమంలో విద్యార్థులు, చిన్నారులు, గ్రామస్తులు తదితరులు పాల్గొన్నారు.